Улсын Их Хурлын Төрийн байгуулалтын байнгын хороо өнөөдөр буюу 2025 оны зургадугаар сарын 2-нд хуралдаж, энэ хаврын чуулганаар хэлэлцэхээр төлөвлөөгүй хууль, тогтоолын төслүүдийг хэлэлцүүлэгт оруулах эсэхийг хэлэлцэн шийдвэрлэлээ.

Монгол Улсын Засгийн газраас сүүлийн өдрүүдэд өргөн мэдүүлсэн хэд хэдэн хуулийн төслийг, тухайлбал:

• Нийтийн албан тушаалтны хууль бус хөрөнгийг иргэний журмаар нэхэмжлэх тухай хуулийн төсөл,

• Төлбөрийн чадваргүйдлийн тухай шинэчилсэн найруулгын төсөл,

• Шүүхийн шийдвэр гүйцэтгэх байгууллагын тогтолцооны шинэчлэлтэй холбоотой хуулиуд,

• Арилжааны хуулийн шинэ төслүүд,

• Мөн УИХ-ын гишүүн Х.Тэмүүжин нарын өргөн барьсан Эрүүгийн хуульд нэмэлт, өөрчлөлт оруулах тухай хуулийн төсөл

зэргийг хаврын чуулганаар хэлэлцэхийг хуралдаанд оролцсон гишүүдийн олонх дэмжсэн байна.

Мөн уг хуралдаанаар “Монгол Улсын Ерөнхий сайдад итгэл хүлээлгэх тухай” асуудлыг хэлэлцэв. Ерөнхий сайд Л.Оюун-Эрдэнэ танилцуулгаддаа “Хурдтай хөгжлийн төлөөх Зориг” уриан дор хэрэгжүүлж буй Засгийн газрын бодлого, үндэсний баялгийн сан, мега төслүүд, бүсчилсэн хөгжил зэрэг зорилтуудын хэрэгжилтийг дэмжих шаардлагыг онцлон дурдлаа.

Хэлэлцүүлгийн дараа УИХ-ын гишүүн Б.Баярбаатар санал хураалтыг нууцаар явуулах горимын санал гаргасныг дэмжсэн бөгөөд санал хураалтыг зохион байгуулах комиссыг байгуулсан юм. Санал хураалтын дүнгээр нийт 23 гишүүн оролцож, тэдний 17 нь Ерөнхий сайдад итгэл хүлээлгэхийг дэмжжээ.

Ингэснээр Байнгын хороо Ерөнхий сайдад итгэл хүлээлгэх эсэх асуудлыг хэлэлцсэн санал, дүгнэлтээ УИХ-ын нэгдсэн чуулганд танилцуулахаар шийдвэрлэлээ.

Эх сурвалж: Улсын Их Хурлын Хэвлэл мэдээллийн алба