Өмнөд Солонгост Ерөнхийлөгч Юн Сок Ёлийн огцролттой холбогдуулан Ерөнхийлөгчийн ээлжит бус сонгуулийн санал хураалт улс даяар эхэллээ. Үндэсний Сонгуулийн Хорооны мэдээлснээр, санал хураалт өглөөний 6 цагаас оройн 8 цаг хүртэл нийт 14,295 санал авах байранд явагдаж байна. Сонгуулийн энэхүү үйл явц нь өмнөх төрийн тэргүүн Юн Сок Ёлийн гэнэт цэргийн онц байдал тогтоох оролдлого хийсний улмаас улс төр, эдийн засгийн гүн хямралд орсон нөхцөл байдалд хариу болгож, зургаан сарын дараа зохион байгуулагдаж буйгаараа онцлог.
Энэ удаагийн сонгуульд 44 сая 391 мянган сонгогч бүртгүүлсэн бөгөөд тэдний 15.4 сая нь өнгөрсөн Пүрэв, Баасан гарагуудад урьдчилсан санал хураалтад оролцжээ. Урьдчилсан санал хураалтын ирц 34.7 хувьтай гарсан нь 2014 оноос хойшхи хоёр дахь хамгийн өндөр үзүүлэлт болсон байна. Санал тоолох ажил санал авах байрууд хаагдмагц эхэлж, шөнө дундын үед ялагч тодрох магадлалтай байгаа бол, албан ёсны үр дүнг Лхагва гарагт 7-9 цагийн хооронд зарлана.
Сонгуульд таван нэр дэвшигч өрсөлдөж байна:
-
Ардчилсан намаас Ли Жэ Мён
-
Ардын хүч намаас Ким Мун Су
-
Шинэ Шинэчлэгч намаас Ли Жун Сок
-
Ардчилсан Ажилчны намаас Квон Ён Гук
-
Бие даагч Сон Жин Хо
Санал асуулгуудаар Ардчилсан намын Ли Жэ Мён, Ардын хүч намын Ким Мун Су нар өрсөлдөөний голд явж байгаа бөгөөд Ли Жэ Мён Кимээс ойролцоогоор 10 хувиар илүү дэмжигдэж буйг мэдээллийн агентлагууд онцолж байна. Хоёр нэр дэвшигч хоёулаа эдийн засгаа сэргээх, гадаадын хөрөнгө оруулалтыг нэмэгдүүлэх зорилт дэвшүүлж байгаа ч Ли Жэ Мён Юн Сок Ёлийн хэрэгт хариуцлага хүлээлгэх, Ким Мун Су “дарангуйлалгүй” ирээдүй бүтээх амлалтаараа ялгарч байна.
Өмнөд Солонгосын Ерөнхийлөгчийн сонгууль нэг шаттай, олонхийн мажоритар тогтолцоотой явагддаг бөгөөд хамгийн олон санал авсан нэр дэвшигч шууд ялалт байгуулдаг. Энэ удаа сонгогдсон Ерөнхийлөгч Үндэсний Ассамблейд шууд тангараг өргөн ерөнхийлөгчийн үүргээ гүйцэтгэж эхэлнэ.
Ажиглагчид дараагийн төрийн тэргүүн улс орны гүнзгий хуваагдлыг даван туулах, төрийн тогтвортой байдлыг сэргээх, иргэдийн итгэлийг дахин олж авах зэрэг хүнд даалгавартай нүүр тулна гэж дүгнэж байна.
Эх сурвалж: Yonhap, Үндэсний Сонгуулийн Хороо
