Улаанбурхан өвчний дэгдэлт нэмэгдсээр байгаа бөгөөд өнөөдрийн байдлаар лабораториор батлагдсан тохиолдол 5309 хүрчээ. Эмнэлэгт хэвтэн эмчлүүлж буй хүний тоо 617, гэрээр эмчлүүлж буй нь 1163, эдгэрсэн хүмүүсийн тоо 3527 болоод байна. Мөн халдвартай иргэдтэй хавьтал болсон 36 307 хүн бүртгэгдсэн нь халдварын тархалт өндөр байгааг харуулж байна.

Эрүүл мэндийн яамны Нийтийн эрүүл мэндийн газрын дарга Д.Баярболдын хэлснээр, улаанбурхан өвчин нь вакцинаар сэргийлж болох бүрэн боломжтой халдварт өвчин бөгөөд нийт бүртгэгдсэн тохиолдлын 60.1 хувь нь товлолын дархлаажуулалтад хамрагдаагүй хүүхдүүд байна. Түүнчлэн вакцинд хамрагдаагүй хүүхдүүд илүү хүндээр өвдөж байгааг онцоллоо.

Хүүхдүүдийн зуслангийн амралт эхэлж, нийслэлийн сурагчид орон нутаг руу хөдөлгөөн хийх байдал эрчимжиж байгаагаас үүдэн халдварын тархалт бүс нутагт хүрэх өндөр эрсдэлтэй болж байна. Тархалтын 83 хувь нь зөвхөн Улаанбаатар хотод бүртгэгдсэн нь нийслэл дэх халдварын төвлөрөл маш өндөр байгааг харуулж байгаа юм.

Тиймээс хүүхдүүдээ амралтаар орон нутагт илгээхээс 14 хоногийн өмнө улаанбурхан өвчний эсрэг вакцинд хамруулж, өөрсдийгөө болон бусдыг халдвараас сэргийлэхийг эцэг эхчүүдэд анхааруулж байна.