Монгол Улсын Ерөнхийлөгч У.Хүрэлсүхийн 2025 оны гуравдугаар сард Польш Улсад хийсэн төрийн айлчлалын хүрээнд Монгол Улсын Эм, эмнэлгийн хэрэгслийн хяналт, зохицуулалтын газар, Польш Улсын Эм, эмнэлгийн хэрэгсэл, биоцидын бүтээгдэхүүний бүртгэлийн газар хооронд хамтран ажиллах тухай санамж бичиг байгуулсан.
Үүний дагуу Польшийн талын байгууллагын Ерөнхийлөгч Гжегож Цессак 2025 оны зургаадугаар сарын 2-6-ны өдрүүдэд Монголд ажлын айлчлал хийж байна. Тэрбээр Эм, эмнэлгийн хэрэгслийн хяналт, зохицуулалтын газарт зочлон байгууллагын үйл ажиллагаатай танилцсан.
Мөн өчигдөр Эрүүл мэндийн сайд Т.Мөнхсайхан ноён Цессакыг ЭМЯ-нд хүлээн авч уулзаж, хамтын ажиллагааны хүрээнд хэлэлцсэн асуудлуудыг үргэлжлүүлэн тодорхой болгох зорилгоор хэд хэдэн санал, хүсэлт тавьсан. Үүнд:
-
Европын Холбооны эм, эмнэлгийн хэрэгслийн бүртгэлийн тогтолцоо, шаардлагын талаарх мэдээлэл солилцох
-
Польшид ажиллаж буй монгол эмч нарын хэрэглэдэг уламжлалт эмийн орц, судалгааны мэдээлэл гаргаж өгөх
-
Монголын бүртгэлийн ажилтнуудыг Польшид сургах, дадлагажуулах хамтын ажиллагаа эхлүүлэх зэрэг асуудал багтсан.
Уулзалтад Польш Улсаас Монгол Улсад суугаа Элчин сайд Кшыштоф Бойко болон элчин сайдын яамны холбогдох албаныхан оролцсон.
