Монгол Улсын Ерөнхийлөгчийн ивээл дор зохион байгуулагдаж буй “Тогтвортой байдлын яриа хэлэлцээ 2025 – Уур амьсгалын өөрчлөлт: Тэрбум мод” сэдэвт чуулга уулзалт үргэлжилж байна. Уг арга хэмжээ нь байгаль орчны тулгамдсан асуудлуудын шийдлийг эрэлхийлэх, уур амьсгалын өөрчлөлттэй тэмцэх үндэсний бодлого, үйл хэргийг дэмжих зорилготойгоор өрнөж буй.
Чуулганы хүрээнд Монгол Улсын Ерөнхийлөгч У.Хүрэлсүх, НҮБ-ын найм дахь Ерөнхий нарийн бичгийн дарга Бан Ги Мүн нар хамтран Үндэсний цэцэрлэгт хүрээлэнгийн “Энхийг сахиулагчдын төгөл”-д дурсгалын мод тарилаа. Тус төгөл нь Монгол Улсаас НҮБ-ын энхийг дэмжих ажиллагаанд оролцсон 20 мянга гаруй энхийг сахиулагчдын нэрэмжит байхаар байгуулагдсан бөгөөд энхийг сахиулах үйл хэрэгт оруулсан монгол цэргүүдийн хувь нэмрийг хүндэтгэн дурсаж буй үйлдэл болж байна.
Бан Ги Мүн энэ үеэр Монголын энхийг сахиулагчидтай албан үүргээ гүйцэтгэж байхдаа уулзаж байснаа дурсан, энх тайвны төлөө хүчин зүтгэсэн монгол залууст гүн талархлаа илэрхийлжээ. Тэрбээр дурсгалын төгөл байгуулж буйг чухал алхам хэмээн онцолсон байна.
Мөн мод тарих үйл ажиллагаанд Зүүн хойд Азийн уур амьсгалын өөрчлөлтийн залуучуудын зөвлөл, Үндэсний байгаль орчны залуучуудын зөвлөл, НҮБ-ын нийгэмлэгийн гишүүд, Ойн газар болон Үндэсний цэцэрлэгт хүрээлэнгийн ажилтан, албан хаагчид нэгдэн оролцлоо.
Харин “Энхийг сахиулагчдын төгөл”-д 2022 онд Монгол Улсад албан ёсны айлчлал хийсэн НҮБ-ын Ерөнхий нарийн бичгийн дарга Антонио Гутерреш мөн өөрийн гараар дурсгалын мод тарьж байсан тухай Ерөнхийлөгчийн Тамгын газраас мэдээлсэн байна.
