Монгол Улсын Их Хурлын даргын 2024 оны 98 дугаар захирамжаар байгуулагдсан ажлын хэсгээс санаачлан зохион байгуулж буй “Эрүүл мэндийн тусламж, үйлчилгээний чанар, хүртээмжийг сайжруулах, хариуцлагын тогтолцоог боловсронгуй болгох нь” сэдэвт хэлэлцүүлэг өнөөдөр эхэллээ. Хэлэлцүүлгийн зорилго нь эрүүл мэндийн тогтолцооны оновчтой зохион байгуулалт, чанар хүртээмжийн асуудлыг судлан, бодит шийдэлд хүрэхэд оршиж байна.

Ажлын хэсгийн ахлагч, УИХ-ын гишүүн Д.Ганмаа хэлэлцүүлгийн үеэр одоо мөрдөгдөж буй Эмнэлгийн тусламж, үйлчилгээний тухай хуулийг шинэчлэх шаардлага тулгарч буйг онцлов. Тэрбээр цахим мэдээллийн сан бүрдүүлэх, хүний нөөцийн ачааллыг бууруулах, гүйцэтгэлд суурилсан урамшууллын тогтолцоо бүрдүүлэх зэрэг асуудлуудад хуулийн шинэчлэл хариулт өгөх ёстой гэдгийг тодотголоо.

Хэлэлцүүлгийн үеэр эрүүл мэндийн байгууллагын удирдлага, зохион байгуулалтын доголдол, төрийн өмчийн эмнэлгийн санхүүжилт, засаглалын асуудал, ажилтнуудын цалин хөлс, ажлын нөхцөл, иргэдийн сэтгэл ханамж зэргийн талаарх судалгаа, санал дүгнэлтүүд танилцуулагдсан. Үүнийг үндэслэн шинэчлэн боловсруулах хуулийн төсөлд тусгах асуудлуудыг тодорхойлохоор ажиллаж байна.

Түүнчлэн хэлэлцүүлэгт УИХ-ын гишүүн Б.Бейсен, Р.Батболд, С.Эрдэнэбат нар оролцож, эмнэлгүүдийн санхүүгийн хүндрэл, хүний нөөцийн хомсдол, удаан хүлээлт, чанаргүй үйлчилгээ зэрэг олон бодит асуудлыг хөндөн, гүйцэтгэлийн санхүүжилтийн тогтолцоонд бэлтгэх суурийг бүрдүүлэхийн чухлыг онцолсон юм.

Хэлэлцүүлгийн үдээс хойших хэсэгт олон улсын туршлага хуваалцах хөтөлбөр үргэлжлэх бөгөөд Эстони, Казахстан улсын эрүүл мэндийн тогтолцооны зохион байгуулалтын туршлагыг танилцуулна. Маргааш ч үргэлжлэх тус хэлэлцүүлэг нь Монголын эрүүл мэндийн салбарын шинэчлэлд чухал суурь болно хэмээн зохион байгуулагчид үзэж байна.