Тээврийн прокурорын газраас 2025 оны зургаадугаар сарын 12-ны өдрийн байдлаар Гадаадын иргэн, харьяатын газрын агаарын замын боомт хариуцсан газраас шалгаж шийдвэрлэсэн “Гадаадын иргэний эрх зүйн байдлын тухай хууль зөрчих” зөрчилтэй холбоотой гомдол, мэдээлэл, шийдвэрлэлт, хэргийн гаралтын судалгааг танилцууллаа.

Судалгаанаас үзэхэд энэ оны эхний хагас жилийн байдлаар нийт 209 зөрчлийн шинжтэй гомдол, мэдээлэл хүлээн авч, бүгдийг хялбаршуулсан журмаар шалгаж шийдвэрлэсэн байна. Зөрчлийн дийлэнх нь оршин суух хугацааг хэтрүүлэх, хууль ёсны бүртгэлгүйгээр оршин суух, холбогдох зөвшөөрөлгүйгээр ажиллах зэрэг үйлдлүүд эзэлж байгаа ажээ.

Тухайлбал, БНХАУ-ын хоёр иргэн визний хугацааг 108 хоног, Ираны нэг иргэн оршин суух зөвшөөрөлгүйгээр 223 хоног хууль бусаар оршин суусан тохиолдолд Зөрчлийн тухай хууль, Гадаадын иргэний эрх зүйн байдлын тухай хуульд заасны дагуу торгууль оногдуулсан байна. Хэтрүүлсэн хоног тутамд 10,000 нэгжтэй тэнцэх хэмжээний төгрөгийн торгууль ногдуулж, зөрчил гаргасан аж ахуйн нэгжид мөн адил хариуцлага хүлээлгэсэн байна.

Эдгээр зөрчил нь ихэвчлэн гадаадын иргэнийг урьж буй иргэн, байгууллагаас хуулийн 10 дугаар зүйлд заасан үүргээ биелүүлээгүйтэй холбоотой байдаг. Тухайлбал, гадаадын иргэнийг хуульд заасан хугацаанд бүртгүүлэх, оршин суух зөвшөөрлийг нь хугацаанд нь сунгуулах үүргийг хариуцлагагүй биелүүлснээс болж хууль зөрчсөн тохиолдлууд олонтоо бүртгэгдэж байна.

Иймд Тээврийн прокурорын газраас гурван хуулийн этгээдэд зөрчлийн шалтгаан, нөхцөлийг арилгуулах прокурорын мэдэгдэл хүргүүлжээ.

Гадаад улсын иргэн Монгол Улсын хууль тогтоомжийг зөрчсөн тохиолдолд торгуулах, албадан гаргах, дахин нэвтрэх эрхийг хязгаарлах зэрэг хариуцлага тооцдог. Иймд гадаад иргэнийг урьж буй иргэн, байгууллагууд холбогдох зөвшөөрөл, бичиг баримтыг бүрэн бүрдүүлэн, Гадаадын иргэн, харьяатын газрын www.isf.mn цахим системд бүртгүүлж, шаардлагатай үйлчилгээг цаг тухайд нь авахыг албаныхан анхааруулж байна.

Эх сурвалж: Тээврийн прокурорын газар.