Нийслэлийн ИТХ-ын дарга А.Баяр, НИТХ-ын төлөөлөгч, “Тархмал эрчим хүчний дэд бүтэц” ХХК-ийн гүйцэтгэх захирал Ч.Батзориг нар БНХАУ-ын Чиндао хотын эрчим хүчний салбарын төлөөлөгчидтэй уулзаж, шатдаг хийн түлшний төслийн хамтын ажиллагааны талаар санал солилцлоо. Энэхүү уулзалт нь нийслэлийн агаарын бохирдлыг бууруулах, иргэдийг цэвэр түлшээр хангах зорилтыг хэрэгжүүлэхэд чиглэж байна.
Монгол Улс 2024 оноос эхлэн нийт 105 мянга 627 өрхийг шатдаг хийн түлшинд холбох томоохон төслийг хэрэгжүүлэхээр төлөвлөсөн. Эхний ээлжид 7,000 өрхийг холбох бөгөөд энэ ажил Баянзүрх дүүргийн гэр хорооллын бүсүүдэд эхэлнэ. Үүний дараа 2030 он хүртэл жил бүр холболтын цар хүрээг тэлэх зорилготой байна.
НИТХ-ын дарга А.Баяр уулзалтын үеэр “Улаанбаатар хотын хамгийн тулгамдсан асуудал болох агаарын бохирдлыг бууруулахад шатдаг хийн түлшийн хэрэглээ чухал нөлөөтэй. Иймд аюулгүй, орчин нөхцөлд тохирсон технологийг нэвтрүүлэхийн зэрэгцээ хамтын ажиллагааны бүх хэлбэрийг дэмжин ажиллана” хэмээн онцлов.
“Тархмал эрчим хүчний дэд бүтэц” ХХК нь энэхүү ажлыг хэрэгжүүлэгч үндсэн байгууллага бөгөөд нийслэлийн иргэдийг цэвэр, хүртээмжтэй эрчим хүчээр хангахын зэрэгцээ агаарын бохирдлыг бууруулж, тогтвортой хөгжилд хувь нэмрээ оруулахыг зорьж байна.
Эх сурвалж: Нийслэлийн ИТХ
