Монголын шашин, соёлын өвийг сурталчлан таниулах зорилготой “Даншиг наадам–Хүрээ цам 2025” наадмын хүрээнд зохион байгуулагдах үзэсгэлэн, худалдаанд оролцох үндэсний үйлдвэрлэгчдийн мандат өнөөдөр албан ёсоор олгогдлоо.
Энэ үеэр Нийслэлийн Жижиг, дунд үйлдвэр, үйлчилгээг дэмжих төв НӨҮГ-ын Ерөнхий менежер М.Сувд-Эрдэнэ дараах онцлог зөвлөмжийг өгч, үйлдвэрлэгчдийн анхаарах асуудлуудыг онцлон тэмдэглэв. Тэрээр хэлэхдээ:
“Үзэсгэлэн, худалдаанд оролцох аж ахуйн нэгжүүд бараа бүтээгдэхүүний өнгө үзэмж, чанар, өрөлт, барааны нөөц зэргийг хангаж ажиллах ёстой. Энэхүү худалдаа нь иргэд, аялагчдад замбараагүй мэдрэмж төрүүлэх биш, соёл, түүх, үндэсний ур ухааныг харуулах цэгцтэй, өндөр зохион байгуулалттай байх ёстой” хэмээн онцолсон юм.
Мандат олгох явц дараах байдлаар явагджээ:
-
Дүүрэг бүрт аж ахуйн нэгжүүдийг бүртгэж, өргөдөл, барааны танилцуулга хүлээн авсан
-
Үүний үндсэн дээр нийслэл болон дүүргийн албаныхан хамтран хуралдаж, сонгон шалгаруулалт хийсэн
-
Шалгарсан аж ахуйн нэгжүүдэд наадамд оролцох албан ёсны эрхийн мандатыг дүүрэг тус бүрээр гардуулсан
“Даншиг–Хүрээ цам” наадам нь зөвхөн дотоодын иргэд төдийгүй гадаадын жуулчдад Монголын уламжлалт шашин, гар урлал, соёлын өвийг танин мэдүүлэх томоохон арга хэмжээ болдгоороо онцлог. Иймд оролцогч үйлдвэрлэгчид гадаадын аялагчдын анхаарлыг татахуйц чанар, дизайн, уран урлалын түвшинд анхаарч ажиллах шаардлагатай байгааг албаныхан дахин дахин сануулсан юм.
Эх сурвалж: Нийслэлийн ЖДҮҮД төв.
