Засгийн газрын өнөөдрийн (2025.06.25) хуралдаанаар яамдын үйл ажиллагааны зохион байгуулалтын бүтэц, орон тооны дээд хязгаарыг батлах тухай Засгийн газрын тогтоолын төслийг хэлэлцэн баталсан талаар Засгийн газрын Хэрэг эрхлэх газрын дарга С.Бямбацогт мэдээллээ.

Шинэ бүтэц, зохион байгуулалтын гол өөрчлөлтүүд:

• Сайд нарын тоог 22-оос 19 болгож бууруулсан

• Үндэсний хороодын тоог 58-аас 29 болгон 50 хувиар цөөлсөн

• Яамдын бүтэц, орон тоог 31 хувиар хассан

Тодруулбал, 16 яамны харьяан дахь:

• 138 газар → 109 газар

• 132 хэлтэс → 77 хэлтэс
  болсон бөгөөд үүний үр дүнд яамдын газар, хэлтсийн дарга нарын тоо 270-аас 186 болж буурчээ.

Энэхүү шинэчлэл нь Ерөнхий сайд Г.Занданшатарын УИХ-д өргөн мэдүүлээд буй Засгийн газрын бүрэлдэхүүний тухай хууль болон дагалдах хуулийн төслийн хүрээнд хийгдэж байгаа бөгөөд үүнд:

• Хяналт, үнэлгээний Үндэсний хороо

• Боомтын сэргэлтийн Үндэсний хороо

• 20 минутын хот Үндэсний хороо
  зэрэг бүтэцтэй холбоотой заалтуудыг хүчингүй болгохоор тусгажээ.

Засгийн газар энэхүү бүтцийн цомхон шинэчлэлээр төрийн хэмнэлт, оновчтой зохион байгуулалт, давхардлыг арилгах, нэгдмэл удирдлагыг сайжруулах зорилго тавьж байгааг албаныхан онцолсон юм.

Эх сурвалж: Засгийн газрын Хэрэг эрхлэх газар.