Улсын Их Хурлын 2025 оны долдугаар сарын гурваны өдрийн нэгдсэн хуралдаанаар “Зээлийн хүүг бууруулах хүрээнд авах зарим арга хэмжээний тухай” Улсын Их Хурлын тогтоолын төслийг хэлэлцлээ. Эдийн засгийн байнгын хорооны санал, дүгнэлтийг УИХ-ын гишүүн Л.Соронзонболд танилцуулж, тогтоолын төслийн хүрээнд зээлийн хүүг бууруулахтай холбоотой арга хэмжээг хэрхэн хэрэгжүүлэх талаар байнгын хорооны байр суурийг мэдээлэв.
Байнгын хороо 2025 оны зургаадугаар сарын гучинд хуралдаж, хянан шалгах ажлын хэсгийн санал, дүгнэлтийн дагуу тогтоолын төслийг боловсруулах асуудлыг хэлэлцсэн байна. Хуралдааны явцад УИХ-ын гишүүд Ирээдүйн өв сангийн хөрөнгийг ямар нөхцөлөөр банкинд хадгалж байгаа талаар, түүний өгөөжийг хүүхдийн хөгжил рүү чиглүүлэх боломж, мөн зээлийн хүүг батлах аргачлал, иргэдийн хадгаламжийн дундаж хугацаа, банк бус санхүүгийн байгууллага болон ломбардуудад олгож буй зээлийн нөхцөл, ахмадын тэтгэврийн зээл, зээлдэгчийн эрх ашгийг хамгаалах бүтэц байгуулах тухай зэрэг олон асуудлаар асуулт тавьж, тодруулга авсан байна.
Мөн УИХ-ын гишүүн Ц.Баатархүү зээлийн хүүг механикаар тогтоох тогтоолын арга барилын талаар шүүмжилж, бодлогын хүү, инфляцын тэнцвэрт байдал, банкны төрөлжилт, санхүүгийн салбарын засаглал, ил тод байдлыг сайжруулах шаардлагыг хөндсөн. Түүнчлэн Монголбанкны ерөнхийлөгч Б.Лхагвасүрэн банкны төрөлжилт сул, хөрөнгө оруулалтын төрөлжсөн банк байгуулах эрх зүйн орчин бүрдсэн ч одоогоор хүсэлт гараагүй талаар тайлбарлав. Тэрбээр арилжааны банкуудын хувьцааны хязгаарлалтад гадны хөрөнгө оруулагчид шүүмжлэлтэй хандаж байгааг онцлоод, хуульд өөрчлөлт оруулах шаардлага буйг дурдсан.
Харин УИХ-ын дарга Д.Амарбаясгалан өр, орлогын харьцааг богино хугацаанд дахин дахин өөрчлөх нь зохисгүй гэж үзэж, мөн банкны салбарын богино хугацааны өндөр хүүтэй зээл давамгайлж, урт хугацааны хөрөнгө оруулалтын зээлд анхаарал хандуулахгүй байгааг шүүмжилсэн. Бодлогын хүүг бизнес эрхлэгчдэд ээлтэй, хэрэглээний зээлийн ачааллаас иргэдийг чөлөөлөх чиглэлд чиглүүлэх шаардлагатайг тэмдэглэжээ. Ийнхүү уг тогтоолын төслийг хуулийн зөрчлийн талаарх шүүмжлэлийн үндсэн дээр Монгол Улсын Их Хурлын чуулганы хуралдааны дэгийн тухай хуульд заасны дагуу Эдийн засгийн байнгын хороонд буцаасан байна.
Эх сурвалж: Монгол Улсын Их Хурал
