ХХААХҮ-ийн сайд Ж.Энхбаяр намрын ургац хураалт эхэлсэнтэй холбогдуулан Шувууны аж ахуй эрхлэгчдийн холбооны төлөөлөлтэй уулзаж, салбарын нөхцөл байдал болон цаашдын зорилтын талаар санал солилцлоо.

Уулзалтад ХХААХҮ-ийн Газар тариалангийн бодлогын хэрэгжилтийг зохицуулах газрын дарга Д.Есөн-Эрдэнэ намрын ургацын балансыг танилцуулан, мэдээлэл өгөв.

Монголчууд жилд дунджаар 500 сая ширхэг өндөг хэрэглэдэг. Монгол Улс 2020 оноос өмнө өндөгний есөн үйлдвэр үйл ажиллагаа явуулж байсан ч өндөгний нийт хэрэгцээнийхээ 50-иас дээш хувийг импортоор авдаг байсан юм. Монгол Улсын Ерөнхийлөгч У.Хүрэлсүхийн санаачилсан “Хүнсний хувьсгал”, “Атрын IV аян” үе шаттай хэрэгжиж эхэлснээр дотоодын аж ахуйн нэгжүүд шинэ үйлдвэрийн байр, тоног төхөөрөмж, үйлдвэрлэлийн хүчин чадлаа нэмэгдүүлснээр Монгол Улсын нийт өндөгний хэрэгцээний 80 хувийг дотоодоосоо хангаж эхэлсэн нь хүнс, хөдөө аж ахуйн салбарт сүүлийн 30 гаруй жил хийгдээгүй томоохон хөнгөлөлттэй зээлийн үр дүн гэдгийг тэд онцоллоо.

Шувууны аж ахуй эрхлэгчдийн холбооны Удирдах зөвлөлийн гишүүн Ж.Болд “Засгийн газраас хэрэгжүүлж буй “Хүнсний хувьсгал”, “Атрын IV” маш сайн бодлогын хүрээнд аяны хүрээнд аж ахуй нэгжүүд хөнгөлөлттэй зээлд хамрагдаж шинэ тоног төхөөрөмж авч үйл ажиллагаагаа өргөжүүлсэн. Шинээр 20 гаруй шувууны аж ахуй эрхлэгч компаниуд нэмэгдсэн. Ингэснээр дотоодын өндөгний нийт хэрэгцээг бүрэн хангах боломж бүрдсэн. Цаашид монголчуудын өндөгний хэрэглээ 650 сая ширхэгт хүрэх тооцоо байгаа. Тэгвэл шувууны аж ахуй эрхлэгчдийн суурилагдсан хүчин чадлаараа бүрэн хангах боломжтой. Энэ жилийн хувьд шувууны аж ахуй эрхлэгчид 60 мянган тонн улаан буудай худалдаж авах тооцоололтой байна” гэсэн юм.

Өндөгний үйлдвэрлэл дотоодод хөгжсөнөөр 100 орчим тэрбум төгрөгийн гадаад валютын урсгал Монгол Улсад үлдэж, эдийн засагт өгөөжөө өгч байгааг холбооны төлөөлөгчид онцоллоо. Тэдний мэдээлснээр ирэх хоёр жилийн хугацаанд гурван сая шувуутай болж, дотоодын өндөгний хэрэгцээг 100 хувь хангаж, малын тэжээлийн үйлдвэрлэл, газар тариалангийн кластер бизнес хөгжүүлэх боломж бүрдэх юм.

ХХААХҮ-ийн сайд Ж.Энхбаяр уулзалтын үеэр “Монгол Улс зөвхөн улаанбуудай, гурил бус өндөг, мах, сүү зэрэг хүнсний 19 төрлийн гол нэрийн бүтээгдэхүүнээ дотоодын үйлдвэрлэлээрээ бүрэн хангаж чаддаг болох ёстой. Энэ бол “Хүнсний хувьсгал”, “Атрын IV аян”-ы үндсэн зорилт. Өнөөдрийн байдлаар өндөгний салбарт гарсан ахиц бол зөв бодлого, хувийн хэвшлийн хөрөнгө оруулалт, аж ахуй эрхлэгчдийн хичээл зүтгэлийн тод жишээ юм” хэмээн онцлон тэмдэглэжээ.

Эх сурвалж: ХХААХҮЯ