Энэ онд хүүхдийн амь насыг санаатайгаар хохироосон таван хэрэг цагдаагийн байгууллагад бүртгэгдээд байна. Өмнө нь бүлэглэн танхайрах, бусдын биеийг гэмтээх зэрэг хэрэг түгээмэл байсан бол сүүлийн үед амь нас хохироосон гэмт хэргийн тоо нэмэгдэж байгаа нь олон нийтийн анхаарлыг татаж байна.
Тухайлбал, 2024 оны зургадугаар сарын 21-нд 16 настай охины амь насыг хохироосон хэрэг гарсан ч өнөөдрийг хүртэл шийдэгдээгүй байна. Хэргийг мөрдөн шалгах явцад уг этгээд өөр нэг эмэгтэйн амийг хохироосон нь тогтоогдсон ч шүүх ажиллагаа удааширсан талаар иргэдээс шүүмжлэл гарчээ. Прокурорын байгууллагаас мэдээлснээр уг хэргийг 2025 оны нэгдүгээр сард шүүхээр хэлэлцсэн ч нэмэлт ажиллагаа хийхээр буцаасан байна.
Цагдаагийн байгууллагын мэдээлснээр, улсын хэмжээнд жилдээ дунджаар 3-5 хүүхдийн амь насыг хохироосон хэрэг бүртгэгддэг. Энэ онд гэхэд хоёрдугаар сард Төв аймагт 10 сартай хүүхдийн амь нас хохирсон бол есдүгээр сарын 9-нд нийслэлийн Баянзүрх дүүрэгт хоёр настай хүүхдийн амь насыг бүрэлгэсэн хэрэг гарчээ.
Судалгаагаар ийм төрлийн гэмт хэргийн гол шалтгаан нь архидан согтуурах, эцэг эхийн үл хайхралтай холбоотой байна. Мөн нийгмийн сөрөг мэдээлэл, гэр бүлийн орчны зөрчил, залуусын хүмүүжил төлөвшлийн асуудал нөлөөлж буйг сэтгэл судлаачид онцолж байна.
Эрүүгийн хуулиар хүний амь насыг санаатайгаар хохироосон тохиолдолд 25 жил эсвэл бүх насаар хорих ял оноох зохицуулалт үйлчилж байгаа юм.
