Өнгөрөгч 27-ны өдөр хуралдсан МАН-ын Бага хурал болон хурлын үр дүнтэй холбоотойгоор өнөөдөр УИХ дахь АН-ын бүлэг, тус намын Улс төрийн зөвлөл өргөтгөсөн хуралдаан хийсэн. Хуралдаанаас гаргасан шийдвэрийн талаар АН-ын дарга О.Цогтгэрэл мэдээлэл хийж, УИХ-ын дарга Д.Амарбаясгалан, Ерөнхий сайд Г.Занданшатар нарт шаардлага хүргүүлсэн.
Энэ үеэр АН-ын дарга О.Цогтгэрэл дараах мэдэгдлийг хийлээ.
-"МАН-ын өндөр албан тушаалтнууд нь авлига албан тушаал, эрүүгийн онц хүнд гэмт хэрэг үйлдсэн байж болзошгүй, мөн хуулийн байгууллагууд улстөрчдийн захиалгаар ажилладаг тухай эрх баригч намын хариуцлагатай албан тушаал хашиж байсан болон одоо ажиллаж байгаа албан тушаалтнууд мэдэгдсэнийг хууль шүүхийн байгууллага шалгаж тогтоох шаардлагатай. Энэхүү ноцтой мэдээлэл үнэн бол өнөөгийн УИХ-ын дарга хуулийн хариуцлага хүлээх ёстой бөгөөд асуудал эцэслэн шийдвэрлэгдэх хүртэл УИХ-ын хуралдааныг удирдах ёс зүйн эрхгүй гэж үзэж байна. Харин уг мэдээлэл худал бол гүтгэгч этгээдэд хуулийн хариуцлага хүлээлгэж, шударга ёсыг хэрэгжүүлэх зүй ёсны шаардлага үүсч байна" гэв.
