Тулгар төрийн 2228, Их Монгол Улсын 813, Ардын хувьсгалын 98 жилийн ой Үндэсний их баяр наадмын хүчит бөхийн барилдаанд ес даван түрүүлсэн Хэнтийн аймгийн Өмнөдэлгэр сумын харъяат Улсын аварга Э.Оюунболдод хүндэтгэл үзүүлэх, мялаалга наадмын товыг гаргажээ.

Энэ сарын 18-ны өдөр Хэнтий аймгийн төв Чингис хотод болох Аваргын мялаалга наадамд хүчит 128 бөх барилдаж, их нас, соёолон, дааганы уралдаан болох юм байна. Мөн баяр наадмын нээлтийн үеэр үндэсний бөхөөр хичээллэдэг 300 хүүхдийн жагсаал болох гэнэ.

Баяр наадмын хурдан морины салбар хорооноос Монгол Улсын Засгийн газрын тогтоол, аймгийн Засаг даргын захирамжийг үндэслэн аваргын наадамд эрлийз адууг уралдуулахгүй байх шийдвэр гаргасан байна. Энэ тухай Хэнтийн аймгийн Засаг даргын Тамгын газраас өнөөдөр мэдээлжээ.