Аж үйлдвэр, Эрдэс баялгийн яамны Төрийн нарийн бичгийн дарга С.Магнайсүрэн БНХАУ-ын технологийн компаниудыг хүлээн авч уулзав.

Уулзалтын эхэнд Төрийн нарийн бичгийн дарга С.Магнайсүрэн хамтарсан Засгийн газраас Аж үйлдвэр, Эрдэс баялгийн яам байгуулсныг онцлоод, Засгийн газар цаашид үйлдвэржилтэд түлхүү анхаарч, инноваци, орчин үеийн дэвшилтэт технологид суурилсан, байгальд ээлтэй, хариуцлагатай уул уурхайг хөгжүүлэх зорилттой ажиллаж байгааг тэмдэглэв.

БНХАУ-ын уул уурхай, тээвэр, ложистик, шинэ эрчим хүчний эх үүсвэр, ухаалаг тээвэрлэлтийн чиглэлээр ажилладаг “CRRC Zhuzhou electric locomotive” судалгааны хүрээлэн, “Shanghai intelligent connected vehicle” технологийн төв, Liyu group компаниуд Монгол Улсын уул уурхайн салбарт эрчим хүчний шинэ эх үүсвэрийг ашиглахад хамтран ажиллах сонирхолтойгоо илэрхийлжээ.

Төлөөлөгчдийн тэргүүн, ахлах эдийн засагч Лю Жиачэн компаний үйл ажиллагаа, үйлдвэрлэл, эрчим хүчний шинэ эх үүсвэрийн техник, тоног төхөөрөмж, технологийн шийдлүүд, хилийн чанадад хэрэгжүүлэх боломжтой технологийн талаар танилцуулаад, БНХАУ-ын ӨМӨЗО-ны Хөх нуур муж зэрэг газарт шинэ эрчим хүчний 50 хувийг хэрэглэж байгааг онцолжээ.

Мөн "Liyu Group" компани Монгол Улстай нүүрсний метан хий ашиглаж, эрчим хүчний эх үүсвэр гаргах чиглэлээр хамтран ажиллах сонирхолтой байгааг илэрхийлснийг Аж үйлдвэр, Эрдэс баялгийн яам мэдээлжээ.

Төрийн нарийн бичгийн дарга С.Магнайсүрэн төлөөлөгчдийг хамтран ажиллах сонирхолтой байгаад талархал илэрхийлээд, техникийн түвшинд уулзалт зохион байгуулж мэргэжилтэн экспертүүд хооронд санал солилцохыг яам дэмжихэд бэлэн гэдгээ тэмдэглээд, ирэх 10 дугаар сарын 2-5-нд Улаанбаатарт зохион байгуулах “Уул уурхайн долоо хоног -2024" болон “MinePro” үзэсгэлэнд оролцож, Монголын аж үйлдвэр, эрдэс баялгийн салбарт хэрэгжүүлэх төсөл хөтөлбөр, хамтран ажиллах чиглэл, үйл ажиллагаатай танилцахыг урьжээ.