Олон улсын олимпын хорооны (ОУОХ) 143 дугаар чуулган өнөөдөр Швейцарын Лозанна хотноо эхэлж байна. Тус чуулганд Монгол Улсаас ОУОХ-ны гишүүн, Монголын үндэсний олимпын хорооны (МҮОХ) ерөнхийлөгч Б.Баттүшиг оролцож байна.

Энэ удаагийн чуулганы гол онцлог нь ОУОХ-ны ерөнхийлөгчийн албан тушаалд нэр дэвшиж буй долоон гишүүний мөрийн хөтөлбөрийг танилцуулах явдал юм. ОУОХ-ны ерөнхийлөгчийг сонгох санал хураалт 2025 оны гуравдугаар сард Грекийн Афин хотноо болох 144 дүгээр чуулганаар явагдах бөгөөд шинээр сонгогдсон ерөнхийлөгч 2025-2028 оны хооронд Олимпын хөдөлгөөнийг удирдах юм.

Мөн энэ чуулганаар 2028 оны Лос Анжелесийн зуны Олимпын хөтөлбөрт боксын спортыг хэвээр үлдээх эсэх зэрэг чухал асуудлыг хэлэлцэнэ.

Б.Баттүшигийн ОУОХ-ны ерөнхийлөгчтэй хийсэн уулзалт

МҮОХ-ны ерөнхийлөгч Б.Баттүшиг ОУОХ-ны ерөнхийлөгч Томас Бахтай уулзаж, Монгол Улс олон улсын олимпизмын үйл хэрэгт илүү идэвхтэй оролцох, ОУОХ-ны чуулган болон залуучуудын олимпын наадам зэрэг томоохон спортын үйл ажиллагааг эх орондоо зохион байгуулах талаар санал солилцсон байна.

Томас Бах 2013 оноос хойш ОУОХ-ны ес дэх ерөнхийлөгчөөр ажиллаж байгаа бөгөөд түүний удирдлага дор “Токио 2020” болон “Бээжин 2022” Олимпын наадмууд цар тахлын хүнд нөхцөлд амжилттай зохион байгуулагдсан юм. Тэрбээр “Монреаль 1976” Олимпын наадмаас туялзуур сэлэмний багийн төрөлд алтан медаль хүртэж байсан билээ.