Эдийн засгийн хамтын ажиллагаа, хөгжлийн байгууллага (ЭЗХАХБ) болон Нээлттэй засгийн түншлэл олон улсын байгууллага хамтран “Ази, Номхон далайн бүсийн чуулга уулзалт-2025”-ыг 2025 оны хоёрдугаар сарын 4-8-нд Филиппин улсын Манила хотноо зохион байгуулав.
Чуулганы гол хэлэлцүүлэг нь ардчиллыг бэхжүүлэх, төр засгийн ил тод, нээлттэй, хариуцлагатай байдлыг дээшлүүлэх шинэчлэлүүдийн талаар байлаа. Түүнчлэн бүс нутагт тулгарч буй асуудлуудыг хөндөж, хамтын ажиллагааг өргөжүүлэх гарц шийдлийг хэлэлцсэн юм.
Монгол Улс чуулга уулзалтад оролцлоо
Монгол Улсаас УИХ-ын Тамгын газрын дэд дарга Э.Лхагва чуулга уулзалтад оролцож, парламентын ил тод байдал, иргэдийн оролцоог нэмэгдүүлэх чиглэлээр хэрэгжүүлж буй санаачилгуудыг танилцууллаа.
Тэрбээр Монгол Улсын Их Хурал жендэрийн мэдрэмжээ үнэлсэн 13 дахь парламент төдийгүй хүний эрхийн үнэлгээ хийсэн анхны парламент гэдгийг онцлов. Энэхүү үнэлгээний тайлан, санал зөвлөмжүүд нь Монгол Улсын Их Хурлын үйл ажиллагааг хүний эрхийг дээдэлсэн, жендэрийн мэдрэмжтэй байхад хувь нэмэр оруулж буйг тодотголоо.
"Гурван төгөлдөршил" бодлого
Мөн тэрбээр УИХ-ын даргын санаачилсан “Гурван төгөлдөршил” бодлогын талаар танилцууллаа. Энэ бодлого нь Монгол Улсын Үндсэн хуулийн эрхэм зорилгод тулгуурлан, хүмүүнлэг, иргэний ардчилсан нийгмийг хөгжүүлэх зорилготой юм.
"Гурван төгөлдөршил" бодлогын хүрээнд:
- Хүний эрхийг хангах, хамгаалах, хүн төвтэй хууль эрх зүйн орчныг бүрдүүлэх
- Хуулийг ойлгомжтой, тодорхой, иж бүрэн зохицуулалттай болгох
- Нийгмийн хурдацтай хөгжлийн шаардлагад нийцүүлэн хуулийн зохицуулалтыг цаг алдалгүй гаргах
Энэхүү бодлого нь төлөөллийн ардчиллыг бэхжүүлэх, хууль тогтоомжийг боловсронгуй болгох, нийгмийн оролцоог нэмэгдүүлэх зорилготой гэж тэрбээр онцлов.
Орон нутаг дахь хууль сурталчлах төвүүд
Илтгэлийнхээ төгсгөлд парламентын бодлого шийдвэр, баталсан хууль тогтоомжийг олон нийтэд ойлгомжтой байдлаар таниулах, мэдээлэл түгээх зорилгоор Хууль сурталчлах төвүүдийг Баянхонгор, Дархан-Уул, Өвөрхангай, Говьсүмбэр аймагт байгуулсныг онцоллоо.
Эдгээр төвүүд нь:
- УИХ-ын үйл ажиллагаанд олон нийтийн оролцоог нэмэгдүүлэх
- Иргэдэд хууль тогтоомжийн талаар мэдээлэл өгөх
- Ил тод, нээлттэй засаглалыг хөгжүүлэхэд чухал ач холбогдолтой
Чуулганы ач холбогдол
Чуулга уулзалтад Ази, Номхон далайн бүсийн 800 гаруй төрийн болон иргэний нийгэм, олон улсын байгууллагын төлөөлөгчид оролцож, бүс нутгийн ил тод, хариуцлагатай засаглалыг бэхжүүлэх, хамтын санаачилгыг хэрэгжүүлэх талаар хэлэлцлээ.
Эх сурвалж: УИХ-ын Хэвлэл мэдээллийн газар
