Apple компани ирэх дөрвөн жилийн хугацаанд АНУ-д 500 тэрбум ам.долларын хөрөнгө оруулалт хийхээр болжээ. Энэ хүрээнд тус компани Техас мужид хиймэл оюун ухааны серверийн аварга том үйлдвэр байгуулж, судалгаа, хөгжүүлэлтийн чиглэлээр улс даяар 20 мянга орчим ажлын байр бий болгох төлөвлөгөөтэй байна.
Энэхүү шийдвэрийг Apple-ийн гүйцэтгэх захирал Тим Күүк өнгөрсөн долоо хоногт АНУ-ын Ерөнхийлөгч Дональд Трамптай уулзсаныхаа дараа зарласан байна. Apple компани Д.Трампын эхний бүрэн эрхийн хугацаанд Хятадын бараанд ногдуулсан татвараас чөлөөлөгдөж байсан ч одоо тус улсын үйлдвэрлэсэн ихэнх бүтээгдэхүүнд 10 хувийн татвар ногдуулж магадгүй байгаа аж.
Apple компани 2018 онд мөн АНУ-ын эдийн засагт 350 тэрбум ам.долларын хөрөнгө оруулалт хийхээ мэдэгдэж байсан. Харин даваа гарагт тус компанийн хувьцааны ханш 1.2 хувиар өссөн байна.
Д.Трамп "Truth Social" нийгмийн сүлжээний хуудсаараа дамжуулан Apple болон Т.Күүкт талархал илэрхийлж, энэ алхам нь компанийн одоогийн засаг захиргаанд итгэж буйг харуулж байна гэж мэдэгджээ.
Apple-ийн ихэнх бүтээгдэхүүнийг гадаадад угсардаг ч олон эд анги нь Америкт үйлдвэрлэгддэг хэвээр байна. Өнгөрсөн сард тус компани Тайванийн TSMC компанийн эзэмшлийн Аризона дахь үйлдвэрт өөрийн загварын чипүүдийг олноор үйлдвэрлэж эхэлжээ.
Эх сурвалж: Reuters
