Санхүүгийн зохицуулах хорооноос даатгалын салбарын үйл ажиллагаанд шинэчлэлт хийж, "Даатгагч болон даатгалын мэргэжлийн оролцогчийн үйл ажиллагаанд тавигдах шаардлага, дагаж мөрдөх үзүүлэлт"-д ипотекийн даатгалтай холбоотой өөрчлөлтийг орууллаа.
Энэхүү зохицуулалтаар зээлдэгч нь барьцаа хөрөнгөө ердийн даатгалын компанид даатгуулах бөгөөд зээлдэгчийн амь нас, эрүүл мэндийн даатгалын хувьд зөвхөн урт хугацааны даатгагчийн санал болгож буй бүтээгдэхүүнд хамрагдахаар болж байна.
Шинэ зохицуулалт хэрэгжсэнээр:
- Даатгалын хамгаалалт 5-6 дахин нэмэгдэнэ.
- Даатгуулагч болон түүний гэр бүл санхүүгийн хүндрэлд орох, орон байрныхаа төлбөрийг төлж чадахгүй болох эрсдэлээс сэргийлнэ.
- Даатгалын гэрээг жил бүр сунгах шаардлагагүй болсноор цаг хугацаа, зардал хэмнэнэ.
- Даатгалтай холбоотой маргаан багасах, зээлийн тогтвортой байдлыг хангах ач холбогдолтой.
Шинэчилсэн зохицуулалт нь ипотекийн зээлийн системд урт хугацааны хөрөнгө оруулалтын эх үүсвэрийг бий болгож, зээлдэгчдэд илүү найдвартай орчин бүрдүүлэх давуу талтай гэж үзэж байна.
