Засгийн газрын өнөөдрийн хуралдаанд Зам, тээврийн хөгжлийн сайд Б.Дэлгэрсайхан Гашуунсухайт-Ганцмод боомтын хил дамнасан төмөр замын бүтээн байгуулалтын явцын талаар танилцуулга хийлээ. Танилцуулгатай холбогдуулан Ерөнхий сайд Л.Оюун-Эрдэнэ тус төслийн ажлыг 2025 оны тавдугаар сарын 14-ний дотор эхлүүлэх, төлөвлөгөө гарган хэрэгжүүлэх үүргийг холбогдох байгууллагуудад өгчээ.

Ерөнхий сайдын зүгээс бүтээн байгуулалтын ажлын хүрээнд:

• Төмөр замын барилгын бүсэд шаардлагатай техник, тоног төхөөрөмж, барилгын болон өдөр тутмын хэрэглээний бараа материалыг улсын хилээр нэвтрүүлэх зохицуулалт хийх,

• БНХАУ-ын талтай уялдаа холбоог хангаж, хамтын ажиллагааг идэвхжүүлэх,

• Бүтээн байгуулалтын ажилд бүх талаар дэмжлэг үзүүлэх шаардлагатайг онцлон тэмдэглэв.

Энэхүү төслийг Засгийн газрын 2024–2028 оны үйл ажиллагааны хөтөлбөрт тусгасан бөгөөд “Гашуунсухайт-Ганцмод”, “Ханги-Мандал”, “Шивээхүрэн-Сэхэ” хилийн боомтыг төмөр замаар холбох 14 мега төслийн нэг юм. Төслийн хэрэгжилт нь:

• Экспортын хэмжээ болон зорчигч, ачаа тээврийн нэвтрэх хүчин чадлыг нэмэгдүүлэх,

• Хилийн боомтоор тээврийн хэрэгслийг түргэн шуурхай нэвтрүүлэх,

• Зорчигчдод илүү ая тухтай үйлчилгээ үзүүлэх боломжийг бүрдүүлэх зэрэг давуу талтай.

Мөн Монгол Улс, БНХАУ-ын худалдаа, эдийн засаг, дэд бүтцийн хамтын ажиллагаа идэвхжин, Шивээхүрэн-Сэхэ, Ханги-Мандал, Бичигт-Зүүнхатавч зэрэг боомтуудыг төмөр замаар холбох нөхцөл бүрдэх юм. Үүний үр дүнд 2030 он гэхэд хилийн боомтуудаар нэвтрэх хүчин чадал 80 сая тонноор нэмэгдэх стратегийн ач холбогдолтойг албаныхан онцолж байна.

Эх сурвалж: Монгол Улсын Засгийн газар