Хөвсгөл аймагт спортын авьяаслаг хүүхэд, залуусыг тогтмол бэлтгэх, олон улсын тавцанд амжилт гаргах боломжийг бүрдүүлэх зорилгоор өсвөрийн шигшээ багийг анх удаа байгууллаа. Аймгийн Засаг даргын ивээл дор хэрэгжүүлж буй уг хөтөлбөр нь 7 төрлийн спортын чиглэлээр хэрэгжиж байгаа юм. Үүнд сагсан бөмбөг, гар бөмбөг, шатар, жүдо, чөлөөт бөх, таеквондо, тэшүүрийн төрлүүд багтжээ.

Шигшээ багуудыг удирдан ажиллах дасгалжуулагч нартай Хөвсгөл аймгийн ЗДТГ-ын дарга Г.Гандэлгэр гуравласан гэрээ байгуулж, хамтын ажиллагаагаа албан ёсоор эхлүүлэв. Энэхүү арга хэмжээ нь аймгийн хэмжээнд спортоор хичээллэгч өсвөр үеийнхний тоог нэмэгдүүлэх, цаашлаад улс, тив, дэлхийн тэмцээнд амжилттай оролцох баг тамирчдыг системтэй бэлтгэх шинэ шатны эхлэл болж байна.

Аймгийн Биеийн тамир, спортын газрын дарга Б.Баярсайханы хэлснээр, энэ хөтөлбөр нь Хөвсгөл нутгаас төрөн гарсан шилдэг тамирчдын үлгэрлэлд тулгуурласан бөгөөд жүдо бөхийн дэлхийн аваргын мөнгөн медальт Б.Баасанхүү гэх мэт олон залуугийн амжилт нь дараа үеийн тамирчдад урам зориг өгч байна.

Эх сурвалж: Хөвсгөл аймгийн ЗДТГ