АНУ-ын хамгийн нэр хүндтэй хөрөнгө оруулагчдын нэг Уоррен Баффетт “Berkshire Hathaway” компанийн хувьцаа эзэмшигчдийн ээлжит цугларалтаар олон чухал асуудлаар байр сууриа илэрхийллээ. Энэ жилийн гол онцлог нь Баффетт 94 насандаа тус холдингийн удирдлагаас албан ёсоор огцорч байгаагаа зарласан явдал байв. Түүний оронд 2021 оноос хойш нэр яригдаж байсан 62 настай Грег Абель томилогдохоор боллоо.

Баффетт уг цугларалтаар АНУ-ын ерөнхийлөгч асан Дональд Трампын худалдааны бодлогыг хурцаар шүүмжилж, “Худалдаа бол зэвсэг биш” хэмээн онцлов. Тэрээр АНУ-ын худалдааны саад тотгорууд, тариф тогтоох бодлого нь урт хугацаанд сөрөг үр дагавар авчрах бөгөөд долларын үнэ цэнийг ч үүнд хамааруулан буурч байгааг тэмдэглэлээ.

Баффеттын байр суурь болон компанийн үзүүлэлтүүд:

• Валютын ханшийн уналтын улмаас Berkshire Hathaway $700 саяын алдагдал хүлээжээ.

• Харин компанийн хадгаламжийн мөнгөн дүн $10 тэрбумаар нэмэгдэж, $347.7 тэрбумд хүрсэн байна.

• Баффетт долларын ханш унах нөхцөлд “там руу өнхөрч яваа валют” гэж тодорхойлж, валютын хөрөнгөд хөрөнгө оруулах сонирхолгүй гэдгээ илэрхийлэв.

Хэдий ийнхүү мөнгө зээлийн бодлогын талаарх болгоомжлол илэрхийлсэн ч Баффетт АНУ-ын эдийн засгийн ирээдүйг эерэгээр харж байгаагаа илэрхийлж, “Бид агуу уналт, дэлхийн дайн, атомын бөмбөгийг даван туулсан. Тиймээс шантрах хэрэггүй” гэв.

Тэрээр хөрөнгө оруулагчдад дараах уриалгыг ч мөн хүргэлээ:

• “Хурдан хөдлөх агшин гэж бий. Бид их мөнгө олсон. Учир нь бид эргэн тойрноосоо хурдан хөдлөхөд бэлэн байсан.”

• Түүнчлэн зах зээлийн богино хугацааны хэлбэлзэлд автах хэрэггүйг сануулж, 50%-ийн үнэ уналтыг тэсвэрлэх нь урт хугацааны суурь зарчмыг хадгалах чадамж гэдгийг дахин онцолсон байна.

Эх сурвалж: OfficeLife.media