Сэлэнгэ аймгийн төв Сүхбаатар суманд энэ хаврын мод тарих үндэсний өдрийг тохиолдуулан голт бор, гүйлс, агч, нарс, гацуур зэрэг таван төрлийн 1300 орчим мод тарихаар төлөвлөжээ. Монгол Улсын Ерөнхийлөгчийн зарлигаар жил бүрийн тав болон есдүгээр сарын хоёрдугаар долоо хоногийн бямба, ням гарагийг мод тарих үндэсний өдөр болгон тэмдэглэдэг бөгөөд энэ дагуу тавдугаар сарын 14-ний өдөр бүх нийтээр мод тарих үйл ажиллагаа явагдах юм.
Уг ажлыг сумын нийт төр, төсвийн байгууллагуудын хамтаар зохион байгуулж, “Тэрбум мод” үндэсний хөдөлгөөнийг орон нутагт эрчимжүүлэх, иргэд олон нийтийн оролцоог нэмэгдүүлэх зорилгоор Сүхбаатар сумын Засаг даргын захирамж гарсан байна.
Мөн “Цэмцгэр Сүхбаатар – Ногоон хот” аяны хүрээнд сумын удирдлагууд аймгийн Байгаль орчны газрын Ойн ангийн дарга Г.Цэнгэлзаяа, Бэлчир бүсийн сум дундын ойн ангийн инженер Ж.Ганцэцэг нар орон нутгийн мод үржүүлэгч, суулгац борлуулагч нартай уулзалт хийж, дотоодын худалдан авалтыг нэмэгдүүлэх, тарилтыг төлөвлөгөөт хуваарийн дагуу зохион байгуулах талаар санал солилцжээ.
Энэ нь орон нутгийн эдийн засгийн эргэлтэд эерэг нөлөө үзүүлж, байгаль орчныг нөхөн сэргээх ажилд иргэд, ААН-үүдийн бодит оролцоог хангах чухал алхам болох юм.
Эх сурвалж: Сэлэнгэ аймгийн ЗДТГ
