АНУ-ын тэргүүлэх банкууд болох JPMorgan Chase, Bank of America, Citigroup, Wells Fargo зэрэг санхүүгийн байгууллагууд доллартай уялдуулсан цахим валют буюу стейблкойн гаргах боломжийг хамтран судалж эхэлжээ. Энэ талаар “The Wall Street Journal” сонин эх сурвалжийг иш татан мэдээлсэн байна.

Хэлэлцээ одоогоор анхан шатандаа явагдаж байгаа бөгөөд санхүүгийн гүйлгээг уламжлалт банкны системээс илүү хурдан, хялбар гүйцэтгэх боломжийг стейблкойн олгоно гэж үзэж байгаа аж. Тус валютыг нэвтрүүлснээр олон улсын гүйлгээ, төлбөр тооцоо, шилжүүлгийг хурдасгах, зардал бууруулах зэрэг давуу талуудтай болохыг онцолжээ.

Америкийн банкууд хэрэв өөрсдийн гэсэн стейблкойн гаргахгүй бол криптовалютын зах зээл дээр өрсөлдөх чадвараа алдах эрсдэлтэй гэж үзэж байгаа бөгөөд энэ нь тэднийг шинэчлэл хийхэд түлхэж буй гол хүчин зүйл болоод байна.

Хэдий тийм боловч эцсийн шийдвэрийг хараахан гаргаагүй байгаа бөгөөд банкны үйлчлүүлэгчдийн эрэлт, хууль эрх зүйн орчны өөрчлөлт зэрэг хүчин зүйлсээс хамааран хэлэлцээний явц, үр дүн тодорхой болох юм.

Эх сурвалж: The Wall Street Journal