Израиль, Ираны хоорондын сөргөлдөөний арван нэг дэх өдөр нөхцөл байдал туйлын хурц шатанд хүрч, Ойрхи Дорнодын бүс нутаг даяар түгшүүр нэмэгдэв. Өглөө нь Иран улс цөмийн байгууламжууд руу хийгдсэн бөмбөгдөлтийн хариуд АНУ-ын Катар, Ирак дахь цэргийн баазуудад цохилт өгөхөө анхааруулсан бол орой нь Катар дахь Аль-Удейд нисэх хүчний бааз руу пуужин харважээ. Тус бааз нь Ойрхи Дорнод дахь Америкийн хамгийн том стратегийн цэгийн нэг юм.
Ираны зүгээс энэ ажиллагааг “ялалтын тухай сайхан мэдээ” хэмээн нэрлэсэн ч пуужингуудыг Америкийн довтолгооноос хамгаалах систем амжилттай няцаасан гэж үзжээ. Олон улсын хэвлэлүүдийн мэдээлснээр, Иран энэ довтолгооны талаар Катарт урьдчилан мэдэгдсэн байв. АНУ-ын ерөнхийлөгч Дональд Трамп энэ хариу үйлдлийг “сулхан цохилт” хэмээн тодорхойлж, удалгүй бүс нутгийн энх тайвны тухай мэдэгдэл хийв.
Тухайн үед Персийн булангийн Ирак, Бахрейн, Кувейт, Катар, АНЭ зэрэг улс агаарын орон зайгаа түр хаасан бөгөөд хэдхэн цагийн дараа хязгаарлалтаа цуцалсан байна. Сөргөлдөөний гол цэгүүд болох Иран, Израиль улсууд ийнхүү пуужин харилцан харваж байх хооронд Дональд Трамп энх тайвны санал тавьсан нь сонирхол татав. Ираны зүгээс довтолгоогоо зогсоож, дараа нь Израиль арван хоёр цагийн дараа гал зогсоох шийдвэр гаргасан гэж Трамп мэдэгдэв. Тэрээр “дэлхий 12 хоног үргэлжилсэн дайн албан ёсоор дууссанд баяр хүргэнэ” хэмээн тунхагласан байна.
Израилийн талаас ч мөн Трампын саналд эергээр хандаж, цөмийн болон баллистик пуужингийн хос аюулыг зайлуулсан хэмээн мэдэгджээ. Ираны Гадаад хэргийн сайд ч довтолгоогоо зогсоож байгаагаа мэдэгдсэн ч хоёр талын гал зогсоох тохиролцоо удаан үргэлжилсэнгүй. Хэдхэн цагийн дараа талууд дахин харилцан зөрчсөн бөгөөд үүнд бухимдсан Трамп НАТО-гийн дээд хэмжээний уулзалтад оролцохоор Европ руу явжээ.
Энэхүү хурцадмал нөхцөл байдлаас улбаалан нефтийн үнэ $70 хүртэл унасан нь бүс нутгийн тогтворгүй байдал дэлхийн эдийн засагт ч нөлөөлж байгааг харуулж байна. Ийм нөхцөлд зүгээр л түр зуурын гал зогсоох биш, бодит энх тайвны хэлэлцээ эхлүүлэх шаардлагатай байгаа талаар ажиглагчид анхааруулж байна.
Эх сурвалж: Officelife.media, Reuters.
