Улаанбаатар хотыг хөгжүүлэх 24 мега төслийн нэг болох Дулааны тавдугаар цахилгаан станц (ДЦС-5)-ын бүтээн байгуулалт Баянгол дүүргийн 20 дугаар хороонд хэрэгжихээр төлөвлөгдөж байна. Энэхүү станц нь 340 Гкал дулаан, 300 МВт цахилгаан үйлдвэрлэх суурилагдсан хүчин чадалтай байх бөгөөд нийслэлийн өсөн нэмэгдэж буй эрчим хүчний хэрэгцээг хангах стратегийн ач холбогдолтой төсөл юм.

Уг төслийг Төр, хувийн хэвшлийн түншлэл (ТХХТ)-ийн хэлбэрээр хэрэгжүүлэхээр шийдвэрлэсэн бөгөөд хувийн хэвшлийн түншлэгчийг сонгох уралдаант шалгаруулалтад гурван оролцогч урьдчилсан шалгаруулалтад тэнцэн богино жагсаалтад багтсан байна. Эдгээрээс “Митайм Интернэшнл” ХХК болон “Шунхлай Холдинг” ХХК төслийн саналаа 2025 оны долоодугаар сарын 4-ний өдрөөс өмнө албан ёсоор ирүүлжээ.

Сонгон шалгаруулалтыг Төр, хувийн хэвшлийн түншлэлийн тухай хууль болон Засгийн газрын 2024 оны 210 дугаар тогтоолоор батлагдсан журмын дагуу зохион байгуулж буй. Төслийн санал хүлээн авах үйл явцыг оролцогчдын итгэмжлэгдсэн төлөөлөгчдийн оролцоотойгоор ил тод явуулсан бөгөөд бүх шатанд олон нийтэд нээлттэй мэдээлж ажиллаж байна.

Одоо сонгон шалгаруулалтын ажлын хэсэг ирүүлсэн төслийн саналуудыг хууль, журмын дагуу үнэлэн, хамгийн өндөр оноо авсан оролцогчийг түншлэлийн гэрээ байгуулах хэлэлцээнд урихаар төлөвлөж байгаа юм.

Эх сурвалж: НЗДТГ-ын Хэвлэл мэдээлэл, олон нийттэй харилцах хэлтэс