Ням гарагт болсон НҮБ-ын Аюулгүйн Зөвлөлийн яаралтай хуралдаанаар байнгын таван гишүүн улсын дөрөв нь Газын зурвасыг эзлэх Израилын төлөвлөгөөг эрс шүүмжилж, АНУ уг төлөвлөгөөг дэмжлээ. Ерөнхий сайд Биньямин Нетаньяху палестинчуудыг хойд хэсгээс өмнөд рүү нүүлгэн шилжүүлэх төлөвлөгөөг өнгөрсөн баасан гарагт батлуулсан юм.

ОХУ-аас НҮБ-д суугаа Байнгын төлөөлөгчийн орлогч Дмитрий Полянский энэ шийдвэрийг олон улсын хуулийг бүдүүлгээр зөрчсөн хэрэг гэж нэрлээд, Израил барьцаалагдсан хүмүүсийн асуудлаар хоёрдмол байр суурь илэрхийлж байна гэж шүүмжилсэн байна. БНХАУ-ын Байнгын төлөөлөгч Фу Кон Газын зурвасыг Палестины салшгүй нутаг гэж онцолж, Израилыг аюултай алхмаа нэн даруй зогсоохыг уриалав.

Их Британийн Байнгын төлөөлөгчийн орлогч Жеймс Кариук төлөвлөгөөг буруутган, цэргийн ажиллагааг өргөжүүлэх нь мөргөлдөөнийг зогсоохгүй, харин палестинчуудын зовлонг улам нэмэгдүүлнэ гэж анхааруулав. Францын төлөөлөгчийн орлогч Жей Дармадхикари Израилын шийдвэр нь аюулгүй байдалд үр ашиггүй хэмээн мэдэгдэв.

Харин АНУ-ын Байнгын төлөөлөгчийн орлогчийн үүрэг гүйцэтгэгч Дороти Ши Израилын өөрийгөө хамгаалах эрхийг дэмжиж, ХАМАС-ыг гал зогсоохоос татгалзаж байна гэж буруутгасан байна.

Эх сурвалж: Anadolu