ТАСС мэдээлснээр, БНХАУ-ын Худалдааны яам Америкийн бараа бүтээгдэхүүнд ногдуулах 24 хувийн татварын хэрэгжих хугацааг наймдугаар сарын 12-ноос эхлэн 90 хоногоор хойшлуулах шийдвэр гаргаснаа мэдэгдэв. Харин 10 хувийн татвар хэвээр үйлчилнэ гэж тус яамны цахим хуудсанд дурджээ.
Женевт хийсэн тохиролцооны дагуу АНУ-ын эсрэг тарифын бус арга хэмжээг зогсоох, хойшлуулахад шаардлагатай арга хэмжээ авахыг Хятадын тал илэрхийлсэн байна.
Өчигдөр АНУ-ын Ерөнхийлөгч Дональд Трамп мөн Хятадын бараанд татвар ногдуулах хугацааг 90 хоногоор сунгана гэж мэдэгдсэн. Тавдугаар сарын 10-11-нд Женев хотноо болсон хэлэлцээний үр дүнд харилцан ногдуулсан татварыг 90 хоногийн хугацаанд бууруулах талаар тохиролцсон бөгөөд уг хугацаа өнөөдөр дуусаж байна.
Үүний дараа долоодугаар сарын 28-29-нд Стокхольмд болсон хэлэлцээгээр татвар ногдуулах хугацааг дахин сунгахаар тохирсон ч АНУ-ын Сангийн сайд Скотт Бессент энэ тохиролцоог Ерөнхийлөгч Дональд Трамп бүрэн дэмжсэн тохиолдолд хэрэгжинэ гэж мэдэгджээ.
Эх сурвалж: ТАСС.
