АНУ-ын Ерөнхийлөгч Дональд Трамп даваа гарагт Цагаан ордонд Өмнөд Солонгосын Ерөнхийлөгч Ли Жэ Мёныг хүлээн авч уулзлаа. Уулзалтын үеэр Трамп Умард Солонгосын удирдагч Ким Жөн Унтай энэ онд уулзах хүсэлтэй байгаагаа илэрхийлсэн байна. Тэрбээр сэтгүүлчдэд “Би Ким Жөн Унтай маш сайн харилцаатай. Бусад бараг бүх хүнээс илүү сайн” хэмээн онцолж, энэ нь “сайн зүйл” болохыг дурдсан юм.

Трамп анхны бүрэн эрхийн хугацаандаа Ким Жөн Унтай уулзаж байсан бөгөөд хоёр дахь бүрэн эрхийн хугацаандаа дахин уулзах боломжийг үгүйсгэхгүй хэмээн тэмдэглэв. “Би түүнтэй уулзахыг тэсэн ядан хүлээж байна” гэж тэр хэлжээ.

Өмнөд Солонгосын Ерөнхийлөгч Ли Жэ Мён хоёр улсын хамтын ажиллагааг хөлөг онгоцны үйлдвэрлэл болон бусад үйлдвэрлэлийн салбарт өргөжүүлнэ гэдэгт итгэлтэй байгаагаа илэрхийлсэн бол Трамп худалдааны асуудлыг нухацтай авч үзэхээ мэдэгдсэн байна.

Мөн АНУ-ын Ерөнхийлөгч Өмнөд Солонгос дахь америк цэргийн баазын газрын өмчлөлд сонирхолтой байгаагаа илэрхийлж, 28 мянга гаруй америк цэргийг байрлуулахын тулд холбоотноосоо илүү их төлбөр шаардаж буйгаа тодотгосон юм. “Бид бэхлэлт барихад маш их мөнгө зарцуулсан, Өмнөд Солонгосын хувь нэмэр бий. Гэхдээ түрээсийн гэрээнээс гарах боломж байгаа эсэхийг сонирхож байна” хэмээн Трамп хэлжээ.

Эх сурвалж: Associated Press (AP)