Хималайн нуруунд орсон хүчтэй аадар бороо Жамму ба Кашмир мужид ихээхэн хохирол учрууллаа. Мягмар гарагт мөргөлчдийн замд байрлах хиндү шашны сүмийн ойролцоо хөрс нурж 33 хүн амиа алдсан бол Дода дүүрэгт үерийн ус нам дор хэсгийг бүрхсэний улмаас өөр гурван хүн амиа алджээ.
Лхагва гаригт Пенжаб мужид сургуулийн барилга үерт автсаны улмаас 200 орчим хүүхэд гацсан тухай мэдээлэгдэв. Тави голын дээгүүрх Мадхопур гүүрний хэсэг нурж, автомашинууд усанд автаж байгаа дүрс бичлэг гарсан ч амиа алдсан хүний тоо хараахан тогтоогдоогүй байна.
Жаммуг бусад бүс нутагтай холбодог хурдны замууд эвдэрч, харилцаа холбоо бүхэлдээ тасалдсан ч сэргээн засварлах ажил явагдаж буйг нутгийн эрх баригчид мэдээлжээ. Жамму ба Кашмирын Тэргүүн сайд Омар Абдулла сэргээн босголтын ажилд бүх хүчээ төвлөрүүлж байгааг онцолсон байна.
Энэтхэгийн Цаг уурын газрын мэдээлснээр, наймдугаар сарын 23-наас өнөөдрийг хүртэл Жаммуд 612 мм хур тунадас орсон нь тухайн бүсийн дундаж хэмжээнээс 726 хувиар өндөр үзүүлэлт бөгөөд 1950 оноос хойших хамгийн их хур тунадас болжээ.
Одоогоор зарим бүсэд ус татарч эхэлсэн ч олон голын усны түвшин аюултай хэвээр байгаа талаар албаныхан анхааруулж байна. Энэтхэгийн Шинжлэх ухаан, технологийн сайд Житендра Сингх цахилгаан, усан хангамж, үүрэн холбооны үйлчилгээг сэргээх ажлыг нэн тэргүүнд хийж байгааг мэдэгдлээ.
Эх сурвалж: Reuters
