Өчигдөр буюу даваа гарагт БРИКС-ийн гишүүн орнуудын удирдагчид цахимаар ээлжит бус дээд хэмжээний уулзалт хийж, дэлхийн эдийн засгийн өнөөгийн нөхцөлд худалдаа, хөрөнгө оруулалт, санхүүгийн хамтын ажиллагааны талаар хэлэлцэв. Уулзалтад Оросын Ерөнхийлөгч Владимир Путин Сочигээс оролцсон бол арга хэмжээг Бразилын Ерөнхийлөгч Луис Инасиу Лула да Силва санаачлан зохион байгуулжээ.
Уулзалтын үеэр Лула да Силва АНУ-ын татварын бодлого нь БРИКС-ийн орнуудын эдийн засгийн эсрэг чиглэж байгааг онцлон тэмдэглэж, хамтын ажиллагааг бэхжүүлэхийн чухлыг дурдсан бол БНХАУ-ын удирдагч Ши Жиньпин олон улсын худалдааны дэг журмыг хамгаалж, нээлттэй ил тод байдлыг дэмжих ёстойг мэдэгдэв. Тэрбээр “зарим улс орон тасралтгүй худалдаа, тарифын дайн явуулж байгаа нь дэлхийн эдийн засагт сөргөөр нөлөөлж байна” гэж онцоллоо.
Украины нөхцөл байдлын тухайд Бразилын удирдагч мөргөлдөөнийг бүх талын ашиг сонирхлыг харгалзан шийдвэрлэхийг уриалж, Ши Жиньпин энэ байр суурийг дэмжсэн бол Хятадын Төв телевизийн мэдээлснээр удирдагчид Украины хямралд “Энх тайвны анд нөхөд” бүлгийн үүргийг ашиглаж, Палестины асуудалд “хоёр улс, хоёр ард түмэн” зарчмыг баримтлахаар тохиролцсон байна.
Мөн Египетийн Ерөнхийлөгч Абдель Фаттах ас-Сиси хамтын ажиллагааны ач холбогдлыг онцолж, ӨАБНУ-ын Ерөнхийлөгч Сирил Рамафоса Дэлхийн худалдааны байгууллагын шинэчлэлийг дэмжих байр сууриа илэрхийлэв. Тэрбээр олон туйлт дэлхийн шилжилт явагдаж буйг тэмдэглэж, БРИКС-ийн орнуудын эдийн засгийн тогтвортой байдлыг бэхжүүлэхийн чухлыг дурдсан байна.
Энэхүү уулзалтаар хамтарсан мэдэгдэл гаргаагүй ч удирдагчид олон улсын шударга дэг журамд шилжих шаардлагатай гэдэгт санал нэгдэж, олон талт байгууллагуудын шинэчлэлийг дэмжихээ нотолсон байна.
