Японы Ерөнхий сайд Шигэрү Ишиба албан тушаалаасаа огцрохоо зарласны дараа Либерал ардчилсан намын (ЛАН) даргын төлөөх өрсөлдөөн албан ёсоор эхэллээ. Уг сонгуульд оролцох магадлалтай нэр дэвшигчдийн дунд Эдийн засгийн аюулгүй байдлын сайд асан Санаэ Такаичи, Засгийн газрын Хэрэг эрхлэх газрын дарга Ёшимаса Хаяши, Гадаад хэргийн сайд асан Тошимицү Мотэги, Хөдөө аж ахуйн сайд Шинжиро Коизүми нар багтаж байна.

ЛАН есдүгээр сарын 22-нд албан ёсны сонгуулийн сурталчилгаагаа эхлүүлж, аравдугаар сарын 4-нд санал хураалт, тооллогоо хийхээр төлөвлөжээ. Намын дүрмийн дагуу нэр дэвшигч бүрийг дор хаяж 20 хууль тогтоогч санал болгох ёстой.

Эхний тодорхой алхмыг хийсэн хүн бол ЛАН-ын ерөнхий нарийн бичгийн дарга асан Т.Мотэги бөгөөд тэрбээр нэр дэвшихээ албан ёсоор зарласан. Тэрээр Засгийн газар болон намын олон талын туршлагатай хүний хувьд бүх хүчээ дайчилж ажиллана хэмээн мэдэгдсэн байна. Харин Ш.Коизүми нэр дэвших эсэхээ эргэцүүлж буйгаа илэрхийлжээ.

С.Такаичи бол агсан Ерөнхий сайд Шинзо Абэгийн үзэл бодлыг дэмжигч консерватив чиглэлийн улстөрч бөгөөд өнгөрсөн жил түүний ойрын хүрээллээс гол дэмжлэг авсан. Харин Ё.Хаяши ойрын эх сурвалжийн мэдээллээр өрсөлдөхөөр шийдсэн бөгөөд дэмжигчидтэйгээ ойр дотно харилцахаар төлөвлөж буйгаа хэлжээ.

Жүничиро Коизүмигийн хүү Ш.Коизүми намын эв нэгдлийг бий болгох талаар бодож байгаагаа мэдэгдсэн бөгөөд тэрээр Ерөнхий сайд Ш.Ишибаг огцрохыг ятгасан тухай мэдээлэл ч гарсан байна.

Долоодугаар сарын Зөвлөхүүдийн танхимын сонгуулийн үр дүнд эрх баригч эвсэл олонх болж чадаагүй, Төлөөлөгчдийн танхимд ч цөөнх болсон нь Ш.Ишибагийн огцролтын гол шалтгаан болжээ. Энэ удаагийн сонгууль нь ЛАН-ын ирээдүй, улмаар Японы улс төрийн чиг хандлагыг тодорхойлох чухал үйл явдал болох төлөвтэй байна.