АНУ-ын Ерөнхийлөгч Дональд Трамп өнгөрсөн долоо хоногт The New York Times сонинд 15 тэрбум ам.долларын нэхэмжлэл гаргасан ч Флорида мужийн шүүх түүнийг буцаалаа гэж USA Today мэдээлэв.
Шүүхийн шийдвэрт дурдсанаар, Трампын гаргасан нэхэмжлэлд тодорхой гомдлын үндэслэл үгүйлэгдсэн гэж үзжээ. Гэсэн ч түүнийг шинэчилсэн хувилбараа 28 хоногийн дотор дахин ирүүлэх боломжтой гэж тогтоосон байна.
Трамп өргөдөлдөө The New York Times-ын редакцийн нийтлэлүүд болон Penguin Books хэвлэлийн газраас гаргасан “Аз жаргалтай бүтэлгүй нөхөр: Дональд Трамп хэрхэн эцгийн хөрөнгийг үрэн таран хийж, амжилтын илбийг бүтээсэн тухай” номыг дурдсан байв. Түүний мэдэгдсэнээр, эдгээр бүтээлүүд нь “гажуудсан, санаанаасаа зохиосон мэдээлэл агуулсан” гэжээ.
Анх 85 хуудастай байсан гомдлыг шүүгчийн шаардлагаар 40 хуудас болгон шинэчилсэн бөгөөд хариуцагчдаар хэд хэдэн сэтгүүлч, The New York Times сонин, Penguin Books нэрлэгдсэн байна. Харин The New York Times мэдэгдэл гаргахдаа “Трампын нэхэмжлэлд хууль зүйн үндэслэл үгүй, энэ нь хараат бус сэтгүүл зүйг айлгах оролдлого” гэж мэдэгджээ.
Трамп 2024 оноос хойш ABC News, CBS News, The Wall Street Journal, The New York Times зэрэг томоохон хэвлэл мэдээллийн байгууллагуудад олон тэрбум ам.долларын нэхэмжлэл гаргасан. Энэ онд ABC News, CBS News-тай тохиролцож, түүний ирээдүйн Ерөнхийлөгчийн номын санд нийт 31 сая ам.долларын санхүүжилт олгохоор болсон билээ.
