Их Британид цахилгаан авто машины борлуулалт түүхэн дээд түвшинд хүрч өссөнтэй зэрэгцэн Хятадын “BYD” компанийн борлуулалт онцгой амжилт үзүүлжээ. Тус компани есдүгээр сард нийт 11 271 автомашин худалдаалсан бөгөөд үүний дийлэнхийг хос хөдөлгүүртэй “Seal U” спорт загвар эзэлжээ. “BYD”-ийн мэдээлснээр тус компанийн Их Британийн зах зээлд эзлэх хувь 3.6 хувьд хүрч өссөн бөгөөд энэ нь тус улсад цахилгаан машинд татвар ногдуулаагүйтэй холбоотой гэж үзэж байна.
Их Британийн Авто машин үйлдвэрлэгч, худалдаалагчдын нийгэмлэг (SMMT)-ийн мэдээллээр өнгөрсөн сард дан цахилгаан хөдөлгүүртэй автомашины борлуулалт 73 мянгад хүрч, хос хөдөлгүүртэй загваруудын эрэлт улам нэмэгдсэн байна. Хамгийн их борлогдсон автомашинуудын жагсаалтад “Kia Sportage”, “Ford Puma”, “Nissan Qashqai”-аас гадна “BYD Seal U”, “Jaecoo 7” зэрэг Хятадын загварууд багтжээ.
Европын Холбоо өнгөрсөн онд Хятадын цахилгаан автомашинд 45 хүртэлх хувийн татвар ногдуулахаа мэдэгдсэн бол АНУ ч мөн адил өндөр татвар ногдуулснаар Хятадын үйлдвэрлэгчдийн хувьд зах зээл нь хязгаарлагдаад байна. Харин татваргүй Их Британийн зах зээл Хятадын “BYD” зэрэг компанийн хувьд хамгийн сонирхол татахуйц бүс нутаг болж байгаа бөгөөд тус компани ирэх саруудад илүү олон шинэ загвар танилцуулахаар төлөвлөж буйгаа мэдэгджээ.
Эх сурвалж: BBC.
