Чехийн ням гарагийн парламентын сонгуульд тэрбумтан, улс төрч Андрей Бабишийн удирддаг ANO нам 35 орчим хувийн санал авч тэргүүллээ. 71 настай Бабиш нь 2017-2021 онд Чехийн ерөнхий сайдаар ажиллаж байсан бөгөөд ЕХ-ны татаасыг хууль бусаар ашигласан хэрэгт буруутгагдаж, улмаар эрх баригч намаасаа түлхэгдэн гарч байсан ч шүүхийн шийдвэрээр цагаадсан юм.
Одоогоор түүний хөрөнгө 3.3 тэрбум ам.доллараар үнэлэгдэж, Чехийн хамгийн баян долоо дахь хүн хэмээн тооцогддог. Зарим хэвлэлүүд түүнийг Италийн Берлусконитой зүйрлэн “Бабискони” хэмээн нэрлэдэг. Улс төрийн хувьд тэр өөрийгөө “трампист” хэмээн тодорхойлдог бөгөөд сонгуулийн өмнө Чехийн авлигын эсрэг дэглэмийг сулруулах, Украинд үзүүлэх цэргийн тусламжийг хорогдуулах, мөн Украин Европын Холбоонд элсэхэд бэлэн биш гэж мэдэгдсэн билээ.
Бабишийг Унгарын ерөнхий сайд Виктор Орбаны холбоотон хэмээн үздэг ч тэр өөрийгөө Оросын эрх баригчидтай холбоогүй гэж мэдэгдсэн. Түүний ялалт зөвхөн Чехийн дотоод улс төрд төдийгүй Төв Европ дахь популист, евро итгэлгүй хөдөлгөөнүүдийн нөлөөг нэмэгдүүлэх хандлагатай гэж шинжээчид дүгнэж байна.
Эх сурвалж: OfficeLife.media.
