УИХ дахь МАН-ын бүлгийн 36 гишүүн өчигдөр бүлгийн хуралдаан зарлахыг шаардаж, бүлгийн дарга Ж.Бат-Эрдэнэд шаардлага хүргүүлсэн ч бүлгийн дарга өнөөдөр 12:00 цагт хуралдуулна гэж мэдэгдсэн. Гэвч бүлгийн хурлыг зарлах шаардлага хүргүүлсэн Н.Наранбаатар тэргүүтэй гишүүд өчигдөр 18:00 цаг өнгөрч байхад хуралджээ. УИХ дахь МАН-ын бүлгийн дэд дарга У.Отгонбаяр тус хуралдааныг удирдаж, бүлгийн 36 гишүүн оролцсон байна. Тус бүлгийн хуралдаанаас УИХ дахь МАН-ын бүлгийн дарга Ж.Бат-Эрдэнийг "эв нэгдэл хангаж чадаагүй" үндэслэлээр чөлөөлжээ.

Уг хуралдааныг УИХ-ын гишүүн Ж.Бат-Эрдэнэ, П.Сайнзориг нарын гишүүд "дүрмийн бус" гэж үзэж мэдэгдэл гаргав. УИХ дахь МАН-ын бүлгийн дарга Ж.Бат-Эрдэнэ үүсээд байгаа асуудлаар /2025.10.15/ мэдээлэл хийлээ.

Ж.Бат-Эрдэнэ:

-“УИХ дахь МАН-ын бүлгийн нэг хэсэг гишүүд өчигдөр бүлгийн хурал зарлах шаардлага ирүүлсэн. Шаардлагыг хүлээн аваад өнөөдөр 12:00 цагт бүлгийн хурал зарласан байсан.  Бүлгийн хурлыг бүлгийн дарга товлох дэгтэй.  Гэтэл У.Отгонбаяр тэргүүтэй бусад нөхөд өчигдөр хурал зохион байгуулсан.

Нэгдүгээрт, өчигдөр болсон бүлгийн хурал дүрмийн бус, гаргасан шийдвэр нь хүчингүй. Бүлгийн хурлыг бүлгийн дарга товлодог, хэрвээ бүлгийн дарга эзгүй байвал бүлгийн даргын зөвшөөрснөөр дэд дарга хуралдааныг удирдаж болно. Миний хувьд өчигдөр ордонд байсан. Албан ёсны бүлэг ирэх долоо хоногийн даваа гаригт хуралдаж, нэгдсэн шийдвэрт хүрнэ гэж итгэж байна. МАН-ын Удирдах зөвлөл бямба гаригт /аравдугаар сарын 18/ хуралдана.  Тэндээс гарах улс төрийн шийдвэрийг бүлэг хүлээж байна. Дүрмийн дагуу УИХ дахь МАН-ын бүлгийн дарга Ж.Бат-Эрдэнэ хэвээрээ. Цаашдаа бүлгийн хурлыг дүрмийн дагуу товлоод явна” гэв.