Хятадын Коммунист Намын (ХКН) 20 дахь удаагийн сонгуулийн Төв Хорооны дөрөвдүгээр бүгд хурал Бээжин хотноо даваа гарагт эхэлжээ. 

Уг хурал 10 дугаар сарын 23-ныг хүртэл үргэлжлэх бөгөөд энэ хугацаанд Хятадын удирдлагууд 2026-2030 оны нийгэм-эдийн засгийн хөгжлийн гол чиглэлүүдийг тодорхойлох 15 дахь таван жилийн төлөвлөгөөг хэлэлцэнэ. 

ХКН-ын удирдах дээд байгууллагууд нь таван жил тутамд болдог ХКН-ын их хурал, түүнээс сонгогддог Төв хороо юм. Их хурал завсарласан үед Төв хороо хурлаа хийж, улс төрийн гол шийдвэрүүдийг хэлэлцэн баталдаг. Өмнөх буюу гуравдугаар бүгд хурал 2024 оны 7 дугаар сарын 15-18-ны өдрүүдэд болж байв.

Синьхуа агентлагийн мэдээлснээр, энэ удаагийн хурлын хөтөлбөр нэлээд шахуу байгаа бөгөөд хуралд оролцогчид ХКН-ын Төв хорооны Улс төрийн товчооны ажлын тайланг сонсож, улс орны хөгжлийн 15 дахь таван жилийн төлөвлөгөөний төслийг хэлэлцэнэ. Шинэ төлөвлөгөөний төслийг хурлын дараа олон нийтэд танилцуулах бөгөөд эцсийн төлөвлөгөөг 2026 оны гуравдугаар сард Хятадын хууль тогтоох байгууллага болох Бүх Хятадын Ардын Төлөөлөгчдийн Их Хурлаар хэлэлцүүлж баталснаар хэрэгжиж эхэлнэ. 

Хятадын анхдугаар таван жилийн төлөвлөгөөг 1950-аад онд хэрэгжүүлж байсан ба түүнээс хойш 14 ийм төлөвлөгөө гаргасан байна. 2035 он гэхэд БНХАУ "социалист шинэчлэлийг үндсэндээ биелүүлж дуусгах" зорилтод хүрэхэд ердөө 10 жил үлдэж байгаа учир 15 дахь таван жилийн төлөвлөгөө чухал ач холбогдолтой. 

“Энэхүү төлөвлөгөөг дэлхийн чиг хандлагыг бүх талаар үнэлсний үндсэн дээр боловсруулж, өөрчлөгдөж буй нөхцөлд Хятадын хөгжлийн суурь болох төлөвтэй байна. Эдийн засгийн өсөлт, технологийн шинэчлэл, хүн амын амьжиргаа болон бусад салбар дахь гол зорилго, арга хэмжээг тодорхойлж, шинэчлэлд суурилсан өндөр чанартай хөгжлийг тэргүүнд тавина” гэж Синьхуа агентлаг мэдээлжээ. 

Эх сурвалж: RIA Novosti