Тусгай замын дугуйн дэлхийн аварга шалгаруулах тэмцээн Чили улсын нийслэл Сантьяго хотод эхэллээ.
Тэмцээнд дэлхийн 38 улсын баг тамирчид оролцож байгаа бөгөөд уралдаанууд 2014 онд ашиглалтад орсон "Пеньялолен" гэдэг дугуйн тусгай зам дээр болж байна. 3 мянган үзэгчийн багтаамжтай энэ байгууламжид өмнө нь Пан-Америкийн АШТ /2015, 2023 онууд/, Дэлхийн цомын тэмцээн /2017 ба 2018 онууд/ болж байжээ.
Энэ удаагийн ДАШТ-ийг анхандаа Аргентины Сан-Хуан хотод зохион байгуулахаар төлөвлөж байсан боловч тус улсын эдийн засгийн байдал хүндэрсэн тул хөрш Чили улсад явуулахаар Олон улсын дугуйн холбоо /UCI/ 2024 оны хавар шийдвэрлэсэн юм.
Нийт 1000 гаруй дугуйчид 22 багц медалийн төлөө өрсөлдөх бөгөөд тэдний дотор Оросын 5 тамирчин бий. Хоригоос шалтгаалан тэд бие даасан статустайгаар оролцож, зөвхөн хувийн гараанд уралдах юм.
Өнөөдөр эмэгтэйчүүдийн скрэтч төрөл, эрэгтэйчүүдийн ба эмэгтэйчүүдийн багийн ойрын зайн уралдааны медальтнууд тодрох ба ДАШТ 26-нд өндөрлөнө.
Өмнөх ДАШТ 2024 оны 10 дугаар сард Дани улсад болж, Оросын дугуйчин Я.Бурлакова алтан медаль авч, багийн дүнгээр 9-10 дугаар байруудыг хуваан эзэлж байв. Тус тэмцээнд 4 алт, 5 мөнгө, 2 хүрэл медаль хүртсэн Нидерландын тамирчид түрүүлж, Их Британи /4-4-5/, Данийн дугуйчид /4-2-1/ удаалжээ.
Эх сурвалж: ТАСС
