Өнөөдөр 12:00 цагаас МАН-ын Удирдах зөвлөл хуралдана. Мөн намын ерөнхий нарийн бичгийн дарга нараас бүрдсэн Бодлогын зөвлөл хуралдаж, цаг үеийн асуудал, улс төрийн нөхцөл байдлын талаар хэлэлцэнэ гэдгийг МАН-ын ерөнхий нарийн бичгийн дарга Я.Содбаатар өчигдөр хэвлэлийнхэнд мэдээлсэн.
Я.Содбаатар даргын хэлснээр өнгөрөгч сард болсон МАН-ын Бага хурлын шийдвэр буюу намын даргын сонгуулийн үр дүн, Д.Амарбаясгаланг намын даргаар бүртгүүлэх асуудлыг Улсын дээд шүүх рүү явуулаагүй байгаа юм байна. Ерөнхий нарийн бичгийн дарга энэ тухай "Намын Их хурлаар Д.Амарбаясгалан даргыг баталгаажуулна гэсэн асуудал байхгүй. Манай намын дүрмээр намын дарга, Бага хурал, Хяналтын хороог Их хурлаараа сонгодог. Үүний дагуу сонгууль явуулна” гэсэн байна.
Өөрөөр хэлбэл, МАН-ын дүрэмд зааснаар намын даргад нэр дэвшигч нь Бага хурлын гишүүдийн дийлэнх олонх буюу гуравны хоёрын саналыг авч чадаагүй бол намын даргад сонгогдсонд тооцохгүй. Тэр тохиолдолд намын их хурлаар, ердийн олонхын саналаар шийдэхээр заасан. Тэгэхээр Д.Амарбаясгалан, Г.Занданшатар нарын хувьд ирэх сард болох намын Их хурлаар маргаанаа шийдүүлэх бололтой.
