Камерунд энэ сарын 12-нд болсон Ерөнхийлөгчийн сонгуулийн дүнг Үндсэн хуулийн зөвлөл зарласны дараа тус улсын олон хотод эсэргүүцлийн жагсаал дэгджээ. Тус зөвлөлийн мэдээлснээр, 1982 оноос хойш эрх барьж буй 92 настай Ерөнхийлөгч Поль Бийя 53.66 хувийн санал авч, найм дахь удаагаа төрийн эрхэнд үлдсэн байна. Түүний гол өрсөлдөгч Бакари Исса Чирома 35.2 хувийн санал авсан ч үр дүнг хүлээн зөвшөөрөхөөс татгалзаж, өөрийгөө 60 орчим хувийн саналтайгаар ялсан гэж мэдэгджээ.
Жагсаалын үеэр нийслэл Дуала хотод цагдаа нар нулимс асгаруулагч хий ашиглан жагсагчдыг тараах оролдлого хийсэн бөгөөд мөргөлдөөн гарсан Нью-Белл дүүргийг хааж, шалган нэвтрүүлэх постууд байрлуулсан байна. Мэдээлснээр, аравдугаар сарын 26-нд болсон жагсаалын үеэр дөрвөн хүн амиа алджээ. Сөрөг хүчний нөлөө бүхий төв болох хойд нутгийн Гаруа хотод мөн нөхцөл байдал тогтворгүй хэвээр байгаа аж.
92 настай Поль Бийя нь дэлхийн хамгийн өндөр настай төрийн тэргүүн бөгөөд 1982 оноос хойш Камеруныг удирдаж байгаа хамгийн удаан хугацаанд эрх барьсан удирдагчдын нэг юм.
Эх сурвалж: TASS.
