NHK-ийн мэдээлснээр, ОХУ-ын Ерөнхийлөгч Владимир Путин Кремльд Умард Солонгосын Гадаад хэргийн сайд Чой Сон Хуйтай уулзаж, хоёр улсын хамтын ажиллагаа амжилттай өрнөж байгааг тэмдэглэв. Ерөнхийлөгчийн Тамгын газраас мэдээлснээр В.Путин уулзалтын үеэр “бүх зүйл төлөвлөгөөний дагуу үргэлжилж байна” гэж мэдэгджээ.

Хоёр талын уулзалтын талаар дэлгэрэнгүй мэдээлэл өгөөгүй боловч Ким Жөн Уны Москвад хийхээр төлөвлөж буй айлчлалын талаар санал солилцсон байх магадлалтай гэж шинжээчид үзэж байна. В.Путин өмнө нь Ким Жөн Уныг ОХУ-д айлчлахыг урьсан билээ.

Чой Сон Хуй мягмар гарагт Беларусийн Минск хотноо болох аюулгүй байдлын бага хуралд ОХУ-ын Гадаад хэргийн сайд Сергей Лавровын хамт оролцох төлөвтэй байна. Москва нь Умард Солонгостой стратегийн харилцаагаа бэхжүүлэхэд онцгой ач холбогдол өгч байгаа бөгөөд энэ нь Украины дайнд үзүүлж буй дэмжлэгтэй холбоотой гэж шинжээчид дүгнэжээ.

Өмнөд Солонгосын хэвлэлүүдийн мэдээлснээр, Чой Сон Хуй АНУ-тай хийх боломжит дээд хэмжээний уулзалтын талаар Путинд танилцуулж, байр сууриа уялдуулахыг зорьсон байх магадлалтай. Энэ үеэр АНУ-ын Ерөнхийлөгч Дональд Трамп лхагва гарагт Өмнөд Солонгост айлчлахаар төлөвлөж байгаа бөгөөд тэрбээр Умард Солонгосын удирдагчтай уулзахад бэлэн гэдгээ илэрхийлсэн юм.

Эх сурвалж: NHK