АНУ болон Хятад худалдааны дайныг намжаах хэлэлцээрийг Малайзид амжилттай үргэлжлүүлж, хоёр талын итгэлцлийг сэргээх алхмуудыг тохиролцлоо.

China Daily мэдээлснээр, хоёр орны төлөөлөгчид тариф, хөдөө аж ахуйн бүтээгдэхүүн, экспортын хяналтын талаар харилцан ойлголцолд хүрч, хэлэлцээ “нээлттэй, бүтээлч” уур амьсгалд явагдсан байна. Гэвч шинжээч Гао Линьюнь “АНУ протекционист бодлогоо үргэлжлүүлбэл итгэлцэл алдагдана” гэж анхааруулжээ. Хятадын Ерөнхий сайдын орлогч Хэ Лифэн хоёр тал итгэлцэл дээр суурилсан хамтын ажиллагааг баримтлах ёстойг онцолсон байна.

Reuters агентлаг Куала-Лумпурын АСЕАН саммитийн үеэр хэлэлцээр хийгдсэн гэж мэдээлжээ. Энэхүү тохиролцоогоор АНУ тарифын нэмэгдэлээ зогсоож, Хятад газрын ховор элементүүдийн экспортын хязгаарлалтаа түр хойшлуулах аж. Сангийн сайд Скотт Бессент “100 хувийн татварын аюул ариллаа, Хятадын шар буурцагны худалдан авалт сэргэнэ” гэж мэдэгдсэн байна.

Financial Times сонин хэлэлцээрийг хоёр улсын худалдааны хурцадмал байдлыг зөөлрүүлэх томоохон алхам гэж тодорхойлжээ. Хятад фентанилын экспортын хяналтыг дахин авч үзэх, шар буурцагны импортыг сэргээхээр болж, Трампын засаг захиргаа фермерүүдийн шахалтад хариу өгч байна гэж тус сонин тэмдэглэсэн.

Bloomberg мэдээлснээр Дональд Трамп, Ши Жиньпин нарын уулзалт Азийн эдийн засгийн уур амьсгалыг өөрчлөх чухал боломж хэмээн онцолж, Трамп “үр дүнтэй хэлэлцээр хийнэ гэж найдаж байна” гэж мэдэгджээ.

Эх сурвалж: Iz.ru, China Daily, Reuters, Financial Times, Bloomberg.