Израилын Ерөнхий сайд Биньямин Нетаньяху ХАМАС бүлэглэлийнхэн гал зогсоох хэлэлцээрийг зөрчсөн гэж мэдэгдэж, цэргийнхэнд “хүчтэй хариу цохилт” хийхийг тушаасны дараа Израилын тал Газын зурваст агаараас довтоллоо.
Түүний ажлын албанаас цохилт өгөх болсон шалтгааныг тодорхой дурдаагүй ч Израилын цэргийн эх сурвалжуудын мэдээлснээр, ХАМАС хяналттай бүсэд Израилын цэргүүд рүү халдсан нь хэлэлцээрийг зөрчсөн үйлдэл гэж үзэж байна.
Мөн Б.Нетаньяху ХАМАС-ыг барьцааны хүмүүсийн цогцсыг буруу хүлээлгэн өгч, АНУ-ын зуучлалаар байгуулсан хэлэлцээрийг илт зөрчсөн гэж буруутгажээ. Израилын тал уг цогцсыг өмнө нь нас барсан Офир Царфатигийн үлдэгдэл гэж тогтоосон байна.
Харин ХАМАС бүлэглэл мягмар гарагт өөр нэгэн барьцаалагдсан хүний цогцсыг олсноо мэдэгдсэн ч Израилын агаарын цохилтын төлөвлөгөө зарлагдсаны дараа түүнийг шилжүүлэхээ хойшлуулсан байна.
Израил болон ХАМАС хоёр тал бие биенээ хэлэлцээр зөрчсөн гэж буруутгаж байгаа ч АНУ-ын дэд Ерөнхийлөгч Ж.Д. Вэнсийн хэлснээр, гал зогсоох хэлэлцээр хүчин төгөлдөр хэвээр байгаа бөгөөд “энэ нь мөргөлдөөн огт гарахгүй гэсэн үг биш” гэж тэр онцолсон байна.
АНУ-ын зуучлалтай энэхүү гал зогсоох хэлэлцээр аравдугаар сарын 10-наас хэрэгжиж эхэлсэн бөгөөд 2023 оны аравдугаар сарын 7-нд ХАМАС Израил руу халдсанаас хойш хоёр жил үргэлжилсэн дайныг зогсоох чухал алхам болсон юм.
Эх сурвалж: DW
