Парисын хөрөнгийн бирж дээр Airbus компанийн хувьцаа 10.8 хувиар буурч, нэгж хувьцааны үнэ 182.38 евро болжээ. Forbes-ийн мэдээлснээр хамгийн их борлуулалттай A320 загварын хэд хэдэн шинэ онгоцноос бүтцийн гажуудал илэрсэн нь зах зээлд хүчтэй нөлөөлсөн байна.
Хэдэн арван онгоцны эх биеийн хавтангуудад илэрсэн энэхүү согог нь ашиглалтад явж буй хөлгүүдэд нөлөөлөхгүй ч Airbus шинээр нийлүүлэх зарим онгоцныхоо гаргалтыг түр зогсоосон байна. Энэ нь компани богино хугацаанд хоёр дахь асуудалтай нүүр тулж буйтай холбоотой юм. Өмнө нь нислэгийн чиглэл тодорхойлогч төхөөрөмж буруу заалт өгч байсан тул Airbus хэдэн мянган онгоцыг эргүүлэн татахаар болсон билээ.
Airbus энэ онд нийт 820 шинэ онгоц нийлүүлэхээр төлөвлөсөн бөгөөд 11 сарын дотор 657-ыг хүлээлгэн өгсөн байна. Сонирхолтой нь, саяхан A320 загвар дэлхийд хамгийн олон борлуулалттай зорчигч тээврийн онгоц болсон. 1988 онд зах зээлд гарснаас хойш нийт 12,260 ширхэгийг худалдсан тоо есдүгээр сард бүртгэгдсэн юм.
