Нигерийн төв нутгийн хойд хэсэгт орших Нигер мужийн сургуулиас 11 дүгээр сард хулгайлагдсан 130 хүүхэд суллагдсан гэж тус улсын эрх баригчид ням гарагт мэдэгджээ.

“Террористуудад хулгайлагдсан 130 сурагч одоо суллагдсан. Тэд даваа гарагт Минна хотод ирж, Зул сарын баярыг эцэг эхтэйгээ хамт өнгөрүүлнэ хэмээн найдаж байна” гэж Ерөнхийлөгч Бола Тинубугийн туслах Байо Онануга X хуудсандаа бичсэн байна. Цэрэг-тагнуулын ажиллагааны дүнд сургуулийн сурагчдыг чөлөөлсөн гэдгийг тэрбээр нэмж хэлжээ. Түүний мэдээлснээр, нийт суллагдсан сурагчдын тоо одоо 230 болсон байна.

11 дүгээр сарын 21-нд Папири тосгонд байрлах Гэгээн Мариягийн католик шашны сургуулийн дотуур байрнаас зэвсэгт этгээдүүд 315 сурагч, ажилтныг хулгайлжээ. Хүн хулгайлсан хэргийг аль бүлэглэл үйлдсэн, Нигерийн эрх баригчид тэднийг хэрхэн сулласан нь одоогоор тодорхойгүй байна. Уг сургуулийн 100 орчим сурагчийг 12 дугаар сарын 8-нд сулласан юм. Халдлагын үеэр 50 орчим хүүхэд зугтаж чадсан гэж Нигерийн Христэд итгэгчдийн холбоо мэдэгджээ. AFP агентлаг НҮБ-ын эх сурвалжийг эш татан мэдээлснээр, барьцаалагдсан бүх хүн суллагдсан бололтой байна.

Нигерийн хууль сахиулагчид тус улсын баруун хойд нутаг дахь зэвсэгт бүлэглэлүүдтэй олон жилийн турш тэмцэж ирсэн бөгөөд зэвсэгт этгээдүүд тосгод руу халдаж, хүмүүсийг барьцаалан хулгайлдаг байна. Баруун Африкийн тус улсад хүн хулгайлах хэрэг сүүлийн саруудад улам олон удаа гарч, 12 дугаар сарын эхээр хоёр долоо хоногийн дотор 490 орчим хүн хулгайлагдсан гэж Нигерийн “Punch” сонинд мэдээлжээ. 12 дугаар сарын 2-нд Батлан ​​​​хамгаалахын сайд Бадару Абубакар албан тушаалаасаа огцорсон байна.

Үүний зэрэгцээ Нигерийн зүүн хойд нутаг зэвсэгт бүлэглэлүүд хүн хулгайлах ажиллагаа явуулж байна. “Боко Харам” зэвсэгт бүлэглэлийнхэн 2014 онд 300 орчим сурагч охидыг хулгайлсан бөгөөд зарим сурагч одоог хүртэл сураггүй хэвээр байгаа юм.

Эх сурвалж: DW