Дэлхийн алмазын хамгийн том үйлдвэрлэгчдийн нэг болох De Beers компани 2026 оны тогтмол худалдааны эхэнд бүтээгдэхүүнийхээ үнийг буурууллаа. Энэ нь 2024 оноос хойш анх удаа хийж буй үнийн бууралт бөгөөд уг шийдвэрийг Bloomberg агентлаг онцолсон байна.
Компанийн зүгээс үнийн бууралтын цар хүрээг тодорхой мэдээлээгүй. Учир нь De Beers сүүлийн үед цуглуулга бүрийн нарийвчилсан үнийг зарлахаа больж, нийт үнийн дүнг нэгтгэн тогтоодог болсон бөгөөд зарим ангиллын бүтээгдэхүүний бүрэлдэхүүнийг өөрчилсөн аж. Үүнээс шалтгаалан алмаз бүрийн үнийг шууд харьцуулах боломжгүй болсон ч эх сурвалжуудын мэдээлснээр гурваас дөрвөн каратын засагдаагүй алмазын үнэ мэдэгдэхүйц буурсан байна. Компанийн төлөөлөгчид энэ талаар тайлбар хийгээгүй.
De Beers өмнө нь 2024 оны арванхоёрдугаар сард үнийг бууруулж байсан бөгөөд зах зээлийн сэтгэл зүйд нөлөөлнө хэмээн болгоомжилж, ийм алхмыг тэр бүр хийдэггүй. Үүний улмаас өнгөрсөн онд тус компани хаалттай, явцуу хүрээнд арилжаагаа явуулж, зарим ангиллын алмазын үнэ зах зээлийн дунджаас ойролцоогоор 25 хувиар өндөр байжээ.
Алмазын зах зээл одоогоор удаан үргэлжилсэн гүн хямралын байдалтай байна. Үүнд Хятадад тансаг хэрэглээний эрэлт буурсан, залуусын дунд хиймэл чулууны сонирхол нэмэгдсэн, мөн дэлхийн томоохон экспортлогч Энэтхэгийн бараанд АНУ-аас тогтоосон шинэ татвар нөлөөлсөн гэж шинжээчид үзэж байна. АНУ нь дэлхийн хамгийн том алмазын хэрэглэгчдийн нэг юм.
Үүнээс гадна De Beers өнгөрсөн онд хиймэл алмазын үйлдвэрлэлээ зогсоож, уламжлалт байгалийн алмазын олборлолтод анхаарлаа төвлөрүүлсэн. Бие даасан шинжээч Пол Зимнискийн тооцоолсноор, түүний гаргадаг алмазын үнийн индекс 2025 онд 2.4 хувиар буурсан бол De Beers-ийн алмазын түүхий эдийн үнэ сүүлийн есөн сарын хугацаанд 14 хувиар хямдарсан байна.
Эх сурвалж: officelife.media
