Ерөнхий сайд Г.Занданшатар өнгөрөгч бямба гаригт Дулааны 4-р цахилгаан станцад ажилласныхаа дараа Эрчим хүчний сайд Б.Чойжилсүрэнд нэг сарын хугацаа өгч, энэ хооронд станцад үүссэн асуудлыг бүрэн шийдэхгүй бол хариуцлага тооцно гэсэн билээ. Харин Б.Чойжилсүрэн сайд "100 хоногт шийдэж чадахгүй, огцруулна гэвэл огцорно доо" гэдэг хариутай л сууж байгаа. Анх томилогдсон цагаасаа хойш л "Цахилгааны тасалдлыг яах вэ? Аргална даа", "Утаа яагаад буурахгүй байна? Салхи гарахгүй байна шт" хэмээн аргацаасаар ирсэн Эрчим хүчний сайдад үнэхээр "арга нь барагдах" өдөр нь ирсэн бололтой.
Харин танхимын тэргүүн, Ерөнхий сайд Г.Занданшатар өмнөөс нь аргалчих гэж явсаар байгаад арганд нь өөрөө унаад ойчиж магадгүй болов. Өчигдөр болсон АН-ын 4:11 уулзалтын үеэр АН-ын генсек Д.Амарбаясгалан "Т.Доржханд, Б.Чойжилсүрэн нарт хариуцлага тооцож, огцруулахгүй юм бол Засгийн газрыг өөрийг нь оцруулах ацкийг орон даяар зохион байгуулна" гэж мэдэгдлээ.
Угаасаа АН-ын хувьд оны өмнөөс Засгийн газрыг огцруулах шаардлагад УИХ-ын гишүүдээс гарын үсэг цуглуулаад эхэлчихсэн. Хаврын чуулган эхэллээ л бол өргөн барих асуудал цаг хугацааных. Атал муу дээр муухай, муухай дээр улцан гэдэг болж 4-р станцад болсон осол, үүнээс үүдсэн эрчим хүчний доголдлын улмаас танхимынх нь хоёр сайдад хариуцлага тооцуулах асуудал үүсээд ирлээ. Улс төрийн сөрөг хүчин үүнийг ашиглахгүй бол өөр юу хийнэ гэж.
Тэгээд ч Д.Амарбаясгалан даргын хэлсэнд буруу ташаа гэхээр зүйл нэг ч алга. Дөрвөн жил, гурван Засгийн газар дараалаад Эрчим хүчний сайдаар ажилласан хүнд 30 хоногийн хугацаа өгч, ажил урагшлуулна гэдэг бол нүдээр харах байтугай чихээр сонссон ч хүн итгэхээргүй зүйл. Өнгөрсөн дөрвөн жилд Эрчим хүчний сайдаар ажилласан энэ хүн салбартаа ямар ч шинэчлэл, өөрчлөлтийг авчирсангүй. Салбарын сайн "манаач" л хийж ирсэн байна. Тэгээд манасаар байгаад 400 тэрбумын авилга хулгай гарчихсан, түүнд нь өөрийнх нь томилсон хүн холбогдоод байгаа гэхээр Б.Чойжилсүрэн сайдын хувьд асуудал нэгэнт хүндэрсэн байна аа л гэсэн үг.
"Хоёр жилийн дараа Монгол Улс эрчим хүч экспортлогч орон болохгүй бол би өөрөө явна" гэж ам гарсан Т.Доржханд нь нүүрээ харуулахаа болилоо. Хамтарсан Засгийн газрыг хадгалж үлдье гэж байгаа бол ХҮН-д Т.Доржхандаас өөр сайд хийчих хүн байдаггүй юм уу? Ямар үнэ цэнэтэй гэхээрээ Засгийн газрынхаа "амиар" дэнчин тавьж хамгаалах вэ?
Ажил хийхгүй ээ, чадахгүй ээ гэж байгаа хүнийг "чад аа" гээд чихдээд явах чинь дургүй ламд дарж байж сахил хүртээхийн үлгэр, урдах замдаа нүх ухсанаас өөрцгүй зүйл. Түүнийхээ оронд чаддаг хүнд нь ажлыг нь өгөөд тавьсан зорилгуудаа ажил хэрэг болгохгүй бол ам чинь аягүй хурдан, ажил хэрэг болох нь маш удаан байна аа, Ерөнхий сайд аа. Оны өмнө танилцуулсан ТӨК-иудын хувьчлал, хувьцаалах ажил яг хаахна явна? Тэрнээс чинь ядаж энэ эрчим хүчний салбарын амьдрах эсэх хамаарах гээд байгаа юм биш үү?
Б.СЭМҮҮН
