Дэлхий даяар улс төрчид халдлага, айлган сүрдүүлэлт, дарамт доромжлолд өртөх нь эрс нэмэгдэж байгаа тухай Олон улсын парламентын холбооноос (ОУПХ) лхагва гарагт танилцуулсан судалгаанд дурджээ.
Уг судалгааг өнгөрсөн онд дэлхийн 80 гаруй орны хууль тогтоогчдын дунд явуулсан байна. Үүнээс Аргентин, Бенин, Итали, Малайз болон Нидерланд гэсэн таван улсын 519 албан тушаалтныг сонгон дэлгэрэнгүй асуулга авч, ерөнхий дүр зургийг гаргасан байна.
Нийт 183 орны үндэсний парламентыг эгнээндээ нэгтгэдэг тус холбооны мэдээлснээр, судалгаанд оролцогчдын 71 хувь нь олон нийтийн зүгээс, ялангуяа цахим орчинд дайралтад өртсөн гэж хариулжээ. Эмэгтэй улс төрчид бэлгийн шинжтэй доромжлол дайралтад илүү их өртсөн байна.
“Дэлхий даяар хууль тогтоогчдыг айлган сүрдүүлэх явдал улам гаарч байна. Хэрэв энэ үзэгдлийг хяналтгүй орхивол олон улсын ардчилсан тогтолцоонд ноцтой үр дагавар учруулна” гэж ОУПХ-ны Ерөнхий нарийн бичгийн дарга Мартин Чунгонг Нью-Йорк хот дахь НҮБ-ын төв байранд болсон хэвлэлийн хурлын үеэр мэдэгджээ.
Тэрбээр АНУ дахь нөхцөл байдал "маш хурцадмал" байгааг дурдаад, одоогийн Ерөнхийлөгч Дональд Трампын амь насанд халдахыг завдсан оролдлогууд, мөн Пенсильвани муж улсын амбан захирагч Жош Шапиро, Төлөөлөгчдийн танхимын дарга асан Нэнси Пелосигийн нөхөр, Конгрессын гишүүн Ильхан Омар нарын эсрэг чиглэсэн халдлагуудыг жишээ болгон дурджээ.
М.Чунгонгийн хэлснээр, олон хууль тогтоогч хувийн аюулгүй байдалдаа санаа зовж байгаагаас шалтгаалан үзэл бодлоо илэрхийлэхдээ илүү хянуур болсон нь засаглал дахь төлөөллийн хүрээг хумих эрсдлийг бий болгож байна. Улс төрчдийн чиглэсэн халдлага, дайралт нэмэгдэхэд хиймэл оюун зэрэг шинэ технологиуд нөлөөлж байгаа бөгөөд эдгээрийг цахим орчинд нэрээ нууцалсан этгээдүүд үйлдэж, тэр байтугай зарим улс орны төрийн зүтгэлтнүүд оролцож байж болзошгүйг тэрбээр анхааруулсан байна.
Эх сурвалж: Reuters
