Африкийн улсуудын бараанд ногдуулж буй гаалийн татварыг дангаараа тэглэхээр Хятад улс төлөвлөж байгаа тухай Caixin цахим хуудсанд мэдээлснийг Kazinform агентлаг эш татан дамжуулжээ.

Энэ сарын 14-15-ны өдрүүдэд Аддис-Абеба хотод болсон Африкийн Холбооны 39 дахь удаагийн дээд хэмжээний уулзалтыг тохиолдуулан БНХАУ-ын дарга Ши Жиньпин Африкийн орнуудын удирдагчдад баяр хүргэсэн захидал илгээхдээ татварыг тэглэнэ гэдгийг дурдсан байна.  

Захидалд бичсэнээр, 2026 оны тавдугаар сарын 1-нээс эхлэн БНХАУ-тай дипломат харилцаа бүхий Африк тивийн 53 улсын бараанд татваргүй горим үйлчилж эхэлнэ.

БНХАУ-ын удирдагч илгээлтдээ “Ногоон суваг” болон бусад арга хэмжээ авах замаар Африкийн бараа бүтээгдэхүүнийг Хятадын зах зээлд илүү ихээр гаргахын тулд эдийн засгийн түншлэлийн хэлэлцээр байгуулах асуудлаар хэлэлцээ хийхийг манай улс зорьж байна” хэмээн дурдсан байна. 

Хятад улсын энэхүү алхмыг НҮБ-ын Ерөнхий нарийн бичгийн дарга Антониу Гутерриш өндрөөр үнэлээд, үүнтэй ижил төстэй арга хэмжээ авахыг хөгжингүй болон эдийн засгийн чадавхи өндөртэй улс орнуудад уриалжээ.